28 naýryzda Qazaqstan «Jer saǵaty» halyqaralyq ekologıalyq aksıasyna qatysady, dep habarlaıdy Dala News.

Jergilikti ýaqyt boıynsha 20:30-dan 21:30-ǵa deıin el boıynsha úılerde, keńselerde jáne kóshelerde jaryq bir saǵatqa sóndiriledi. Bıyl aksıanyń taqyryby – ekotýrızmdi damytý.

«Jer saǵaty» – Dúnıejúzilik jabaıy tabıǵat qory (WWF) uıymdastyratyn jyl saıynǵy bastama. Onyń maqsaty – tabıǵat pen resýrstardy qorǵaýǵa qoǵamnyń nazaryn aýdarý.

Aksıa aıasynda Qazaqstandaǵy birqatar nysandardyń jaryǵy óshiriledi. Olardyń qatarynda:
«Báıterek» monýmenti, «Astana Opera», Áziret Sultan meshiti, Táýelsizdik saraıy, «Astana Arena», «Alaý» muz aıdyny, «Qazaqstan» qonaq úıi jáne ál-Farabı atyndaǵy QazUÝ bar.

Jalpy, bul bastamaǵa álem boıynsha 2 mlrd-tan astam adam, 180 eldiń 7 myńnan astam qalasy qatysady. Qazaqstanda aksıa bıyl 17-ret ótedi.

Uıymdastyrýshylar azamattardy 28 naýryz kúni saǵat 20:30-da jaryq pen elektr qurylǵylaryn bir saǵatqa óshirýge shaqyrady.