«Silýettiń» qyzmetine shýlyqtar dán riza
Kásipkerlik salasy kásipkerden qajyrly qimyldy, tynymsyz izdenis pen tabandylyqty talap etedi. Óitkeni búginde naryq aidynynda básekelestikke qarsy turý qiynnyń qiyny ekenin aitpasa da belgili. Tutynýshyǵa usynylyp otyrǵan qyzmet túri bolsyn, taýar bolsyn sapalyq synnan súrinbei ótip, biik úrdisten kórinbese, kásibińiz de turalap, bastaǵan isińiz esh paida ákelmesi anyq. Sondyqtan da, ýaqytpen sanaspai halyqtyń kóńilinen shyǵatyndai qajyrly eńbek etýińiz kerek. Mine, osy turǵydan alyp qaraǵanda Shý aýdanynyń turǵyny Dariǵa Álmuhanbetova kásipkerlikke bilek sybana kirisken jan dep aitýǵa ábden bolady. Zaty názik bolǵanymen isi shiraq, sózi myǵym jannyń búginde atqaryp otyrǵan isi kópke úlgi. Halyqqa meditsinalyq kómek kórsetý qashanda kún tártibinde turǵan ózekti saýaldyń biri ekenin jete túsingen ol, Shý qalasynan «Silýet» emdeý-saýyqtyrý ortalyǵyn ashqan bolatyn. 300 sharshy metrdi alyp jatqan úsh qabatty nysanda birneshe qyzmet túrleri usynylǵan. Tómengi qabattarynda emdik massaj, shashtaraz, sulýlyq salony jáne fitnes ortalyq ornalasqan bolsa, joǵarǵy qabaty túgeldei tis emhanasyna arnalǵan. Ozyq tehnologiialarmen jabdyqalǵan ortalyqtyń jetekshisi 30-dan asa adamdy jumyspen qamtyp otyr. Olardyń ortasha ailyq jalaqysy 60-100 myń teńgeniń aralyǵynda. Munda joǵary bilimi bar, tájiribesi tolysqan marjan tistiń mamandary turǵyndarǵa úzdiksiz qyzmet etýde. Tipti, ortalyqtyń basshysy Dariǵa Sábitqyzy da 30 jylǵa jýyq ýaqyt tis dárigeri bolyp qyzmet atqarǵan eken.
Ýaqyt aǵymynan qalýǵa bolmaitynyn jaqsy túsinetin sergek oily kásipker usynystyń ózi suranystan týyndaitynyn aitady.
Sońǵy úlgidegi stomatologiialyq qondyrǵylarmen jabdyqtalǵan ortalyqta tisti emdeýden bólek, jeke zerthana da qarastyrylǵan. Onda aýyz qýysyndaǵy tister jartylai nemese tolyq jaramsyz bolyp tabylǵan jaǵdaida qoldanylatyn jasandy tis protezderin sońǵy tehnologiiamen daiyndaidy.
Shý aýdany
