Qazaqstan azamattarynyń basym bóligi eldiń damý baǵytyn qoldap, memlekettik institýttarǵa joǵary senim bildirip otyr. Bul týraly sáýir aiynda júrgizilgen Demoscope saýalnamasynyń nátijesinde belgili boldy, dep habarlaidy Dalanews.kz.
Zertteý eldiń barlyq óńirin qamtyǵan. Nátijege sáikes, eń joǵary senim deńgeii Prezident institýtyna tiesili. Memleket basshysyna respondentterdiń 61,3%-y senim bildirgen.
Sonymen qatar Úkimetke – 47,4%, jergilikti ákimdikterge – 50,2%, Parlamentke – 40,5%, quqyq qorǵaý organdaryna – 46,8%, al sot júiesine 43,7% azamat senim artatyny anyqtaldy.
Saýalnama nátijesinde barlyq memlekettik institýttar boiynsha senim bildirgen azamattardyń úlesi syn kózben qaraityndardan joǵary ekeni kórsetilgen.
Sondai-aq, respondentterdiń 72,4%-y Qazaqstannyń damý baǵytyn durys dep baǵalaǵan. Onyń ishinde 44,6%-y el «durys baǵytta» kele jatyr dese, 27,8%-y «kóbine durys baǵytta» dep jaýap bergen.
Zertteý qorytyndysy boiynsha, «Ádiletti Qazaqstan» tujyrymdamasyna da aitarlyqtai qoldaý bar. Respondentterdiń 55,6%-y bul ustanym naqty is júzinde júzege asyp jatyr dep esepteidi.
Saýalnamaǵa elimizdiń barlyq óńirlerinen azamattar qatysqan. Qatysýshylardyń 65,8%-y qazaq tilinde jaýap bergen.
