Shýdaǵy «sheberler otbasy»
Qalai desek te búgingi urpaqtyń arasynda ǵasyrdan ǵasyrǵa jalǵasyp, urpaqtan urpaqqa amanat bolǵan tól ónerdi bosaǵadan ozdyryp, tóbesine kóterip, odan rýhani lázzat alyp júrgen azamattar da kezdesedi. Shynyn aitý kerek, bundai azamattarǵa alystan nemese shetelden kelgen meimanǵa kádesyi retinde usynýǵa qajetti buiym kerek kezde ǵana izdeý salatynymyz bar. Mine, on saýsaǵynan óner tamǵan, kásibinen násibin taýyp, aýyl aimaǵyna qadirli bolyp júrgen osyndai jandardyń biri - Shý aýdanyna qarasty Dalaqainar aýylynyń turǵyny Baýyrjan Jaqsybaev.
Ol bizben áńgimesinde: «Ustalyq pen zergerlik – óte qyzyq óner. Kózdiń jaýyn alyp turatyn dúnieni ómirge ákelgen saiyn rahat kúige bólenesiń. Ony odan saiyn damytyp, sol kásiptiń qyr-syryna sát saiyn qanyǵa túskiń keledi. Temirden túrli buiymdar jasaý men aǵash jonýǵa asqan eptilik qajet. Olai bolmaǵan kúnde, josparlaǵan dúnień oidaǵydai shyǵa qoiýy ekitalai. Qai buiymdy bolmasyn bastar aldynda jasaityn dúnieńdi oisha josparlap alasyń. Sodan keiin baryp jumys bastalady. Zergerlik óner tózimdilik pen shydamdylyqty, eptilik pen yjdaǵattylyqty talap etetin óner. Qoldyń kúshimen, kúrektiń ushymen qoparyp tastaityn aýyr jumys emes. Tómen qarap otyrǵan qalpy alaqandai zatty ádemi etip shyǵarý kerek. Bul is adamnyń kóńil-kúiimen tikelei bailanysty. Jumysqa jan-tánimmen berilgen sátte ǵana jasaǵan dúniem áp-ádemi bolyp shyǵady» degen edi.
Baýyrjannyń qolynan shyqqan buiymdar aýdannyń atynan kórsetilip júrgen kórmelerdiń sóresinen tabylyp júr. Ózi shamalas zamandastaryna qaraǵanda zerek ósken zerger jigit mektep qabyrǵasynda oqytylatyn negizgi pánderden góri «Eńbekke baýlý» pánine zeiinin kóbirek burǵan. Alǵashynda aǵashtan azdy-kópti buiymdar jasap júrgen ol, óz betimen at ábzelderin jasaýǵa den qoiyp, bar yntasyn soǵan qoiady. Mektepti támamdai salysymen Almaty oblysyndaǵy Qaskeleń mádeniet kolledjine oqýǵa túsedi. Mine, sol kezden bastap Baýyrjannyń qolónerge degen yntasy eselene túsip, sol salaǵa túbegeili bet burady. Temirden túiin túigen qas talanttardyń sheberler otbasynan shyǵatyny jáne ol ákeden balaǵa qan arqyly darityny daýsyz. Qolónerdiń qudiretin bala kúninen bilip ósken Baýyrjanǵa da sheberlik ákesinen qonǵan qabilet eken. Al, anasy tiginshilikpen ainalyssa, zaiyby Juldyz Qojaeva da toqyma ónerin janyna serik etken sheber kórinedi. Olardyń ómirin bir arnaǵa toǵystyrǵan da osy sala eken. Búgingi tańda eki birdei balanyń ata-anasyn aýyldastary «sheberler otbasy» retinde tanidy. «Kiimdi de satyp alyp áýre bolmaimyz. Ózimiz qalaǵanymyzsha tigip kiemiz» deidi keiipkerimiz óz sózinde.
2013 jyly oqýyn aiaqtap kelgen jas maman aýyldyq klýbtyń janynan ashylǵan qolóner úiirmesiniń jetekshisi bolyp jumysqa ornalasqan. «Bastysy balada qabilet pen ynta bolsa, ony ary qarai shyńdaýda men aianyp qalmaimyn» - degen Baýyrjan biyl nebári alty balany qolónerge baýlyp jatqanymen, mektep bitirýshi birneshe túlekke osy sala boiynsha baǵyt siltep, óz mamandyǵyn adaspai tańdaýyna yqpal etken. Jumys ornyn ekinshi úii dep esepteitin sheberdiń óz jumysyna degen jaýapkershiliginiń zor ekenin baiqadyq.
Shý aýdany
