Qazaqstanda Konstitýtsiianyń 30 jyldyǵyna bailanysty jariialanǵan amnistiia aiasynda jazasyn ótep jatqan myńdaǵan azamat bostandyqqa shyqty. Bul týraly QR Ishki ister ministrligine qarasty Qylmystyq-atqarý júiesi komiteti (QAJK) málimdedi, dep habarlaidy Dalanews.kz
Komitettiń habarlaýynsha, amnistiiany iske asyrý barysynda sot organdary 15 970 usynysty qarap shyqqan. Nátijesinde, qylmystyq-atqarý júiesi mekemelerinen 2 myńnan astam adam bosatylǵan. Olardyń qatarynda áielder men kámeletke tolmaǵandar da bar.
Sonymen qatar, amnistiia tek bosatýmen shektelmei, jazasyn óteý merzimin qysqartýdy da qamtyǵan. Atap aitqanda, 11 myńnan astam sottalǵan azamattyń jaza merzimi azaitylǵan.
Vedomstvo ókilderiniń aitýynsha, bul sheshim gýmanizm qaǵidattaryna sai qabyldanyp, qoǵamǵa qaita beiimdelýge múmkindik berý maqsatynda júzege asyrylǵan. Amnistiiaǵa ilikken tulǵalarǵa qatysty zań talaptaryna sáikes jeke-jeke tekserý júrgizilgen.
Aita keteiik, atalǵan amnistiia eldiń negizgi zańy — Konstitýtsiianyń 30 jyldyq mereitoiyna orai jariialanǵan jáne qylmystyq saiasatty izgilendirý baǵytyndaǵy mańyzdy qadamdardyń biri retinde baǵalanyp otyr.
