Parlament Májilisinde pedagog mártebesi men bilim berý máselelerine qatysty zań jobasy birinshi oqylymda maquldandy, dep habarlaidy Dala News.
Qujat Memleket basshysy Qasym-Jomart Toqaevtyń pedagogterdiń quqyqtary men zańdy múddelerin kúsheitý jónindegi tapsyrmasy aiasynda depýtattar bastamasymen ázirlengen.
Zań jobasynyń negizgi maqsaty – muǵalimderdiń mártebesin arttyrý jáne quqyqtaryn qorǵaý.
Qujatta birqatar mańyzdy ózgerister usynylǵan. Atap aitqanda, pedagogterdiń jaýapkershiligi tek oqý protsesi kezeńimen shekteledi. Sondai-aq muǵalimderden eseptilikti bir mezgilde qaǵaz jáne elektrondyq formatta júrgizý talap etilmeidi.
Sonymen birge balalardyń ómiri men qaýipsizdigi úshin ata-analardyń jaýapkershiligin keńeitý qarastyrylǵan. Orta bilim berý uiymdarynda uialy telefondardy paidalaný boiynsha biryńǵai erejeler engizý usynylady.
Budan bólek, Úkimet bastamasymen zań jobasyna qosymsha normalar engizilgen. Olardyń qatarynda densaýlyq saqtaý nysandaryn salý jáne paidalaný salasynda memlekettik jekeshelik áriptestik jobalaryna qatysatyn seriktester tizimin keńeitý bar. Sonymen qatar Qazaqstanda sheteldik jetekshi ýniversitetterdiń jumys isteýine qolaily jaǵdai jasaýǵa baǵyttalǵan quqyqtyq tetikter qarastyrylǵan.
Meditsinalyq bilim berý júiesin jetildirý máseleleri de jeke blok retinde engizilgen. Al jergilikti deńgeide mektep oqýshylaryn ǵylymi qyzmetke tartýǵa qatysty túzetýler usynylǵan.
Zań jobasy boiynsha Májilistiń barlyq komitetteri qorytyndy bergen. Jumys tobynyń bes otyrysy jáne komitettiń bir keńeitilgen otyrysy ótkizilgen.
Komitet tóraǵasy Ashat Aimaǵambetov bul qujatty birinshi oqylymda maquldap, Májilistiń jalpy otyrysynyń qaraýyna engizýdi usyndy.
