Qazaqstanda jeke sot oryndaýshylaryna qoıylatyn talaptar men baqylaý tetikteri kúsheıtiledi, dep habarlaıdy Dala News.
Májiliste maquldanǵan zań jobasyna sáıkes, jeke sot oryndaýshylaryn mindetti túrde qaıta atestattaý engiziledi. Atestattaý barysynda olardyń zańnamany jáne Kásiptik ar-namys kodeksin bilý deńgeıi tekseriledi. Qaıta atestattaýdan ótpegen tulǵalar lısenzıasynan aıyrylýy múmkin.
Sonymen qatar kómekshiler men taǵylymdamadan ótýshilerge qoıylatyn talaptar da qatańdatylady. Atap aıtqanda, sońǵy úsh jyl ishinde sybaılas jemqorlyq quqyq buzýshylyqtary úshin jaýapqa tartylǵan adamdardy bul qyzmetke jiberýge shekteý qoıylady.
Zań jobasynda ádilet organdarynyń baqylaý ókilettikterin keńeıtý de qarastyrylǵan. Endi olar anyqtalǵan buzýshylyqtardy joıý týraly mindetti usynystar engize alady. Eger bul talaptar oryndalmasa, lısenzıanyń qoldanylýyn ýaqytsha toqtatý quqyǵy beriledi.
Budan bólek, ýákiletti organdardyń suraýy boıynsha jeke sot oryndaýshylary óz shottaryndaǵy qarajat qozǵalysy týraly málimetterdi usynýǵa mindetteledi.
Osy ózgerister jeke sot oryndaýshylarynyń qyzmetin ashyq ári jaýapty etýge baǵyttalǵan.
