Temirtaý qalasynda buryn sýdıa bolyp eńbek etken zeınetker Prezıdent Qasym-Jomart Toqaevqa ashyq úndeý jasady. Ol óz sózinde ádilet izdep talaı jyldan beri sot tabaldyryǵyn tozdyrǵanyn aıtty, dep habarlaıdy Dalanews.kz.

Eks-sýdányń vıdeosy "Pısma Prezıdentý" telegram arnasynda jarıalandy. 

“1999 jylǵa deıin halyq sotynda qyzmet atqardym. Sot degenimiz – halyq úshin ádilet ordasy bolýy kerek. Biraq qazirgi jaǵdaı múlde kerisinshe: ádilet emes, ádiletsizdik jıi oryn alyp jatyr”, – deıdi burynǵy sýdıa.

Onyń aıtýynsha, 1997 jyly onyń atynan jalǵan senimhat rásimdelip, jalǵyz baspanasy zańsyz túrde úshinshi tulǵalarǵa berilgen. Alaıda azamatsha eshqandaı senimhat bermegenin, qol qoımaǵanyn aıtyp, bul áreketti zańsyz dep esepteıdi.

“Sotqa shaǵymdanyp, qoltańbamdy saraptamadan ótkizýdi suradym. Sot muraǵatynan meniń burynǵy qoltańbalarymdy alyp, salystyrýdy talap ettim. Biraq sot meniń ótinishimdi qanaǵattandyrmaı, ‘qujattar saqtalmaǵan’ dep jaýap berdi. Al zań boıynsha mundaı qujattar turaqty túrde saqtalýy kerek edi”, – deıdi ol.

Zeınetker Prezıdentten “estıtin memleket” tujyrymdamasyna saı naqty áreket jasaýdy talap etti.

“Siz ádiletti Qazaqstan quramyz dedińiz. Endeshe, sot júıesinde de ádildik ornasyn. Zań ústemdigi men sottyń táýelsizdigi – halyqtyń memleketke degen seniminiń negizi. Sol senimdi qaıtaryńyz”, – dep túıindedi ol óz úndeýin.