Ál-Farabi atyndaǵy Qazaq ulttyq ýniversitetiniń ár jyldary bitirgen túlekteri 300 mln teńgege jýyq qarajat jinap, fakýltet aýditoriialary men jataqhana ashanalaryn jańǵyrtýǵa demeýshilik tanytty.
Dástúrli Túlekter kúninde oqý ornynyń basshysy Janseiit Túimebaev ýniversitet damýyna súbeli úles qosyp, belsendilik tanytqan azamattarǵa rizashylyǵyn jetkizdi.
Óz sózinde Janseiit Qanseiituly: «Memleket basshysy Qasym-Jomart Kemeluly Toqaev Qazaqstan halqyna joldaýynda: «Joǵary oqý oryndary janyndaǵy endaýment-qorlar bilim berýdiń ekojúiesin damytýdyń negizgi býynyna ainalýǵa tiis», – dep atap ótken bolatyn. Ózderi bilim alǵan aýditoriia men zerthanalardy zamanaýi jabdyqtaýǵa demeýshilik jasaǵan ár jylǵy túlekterimizge alǵys bildiremiz. Osynyń barlyǵy bizdiń bilim alýshy jastarymyz úshin jasalyp jatqan igi bastamalar», – dep atap ótti.
Sondai-aq himiia jáne himiialyq tehnologiia fakýltetiniń zerthanasyna 200 million teńgeniń jabdyǵyn tartý etken «ALEMTRADE» JShS direktory Serikjan Qazaqbaevtyń, fizika-tehnikalyq fakýltetiniń aýditoriialaryn 40 mln teńgeniń tehnikalyq qurylǵylarymen jasaqtaǵan ár jyldary bitirgen túlekterdiń jomarttyǵyna airyqsha toqtaldy. Zań fakýltetiniń 90 oryndyq dáris zalyn kúrdeli jóndeýden ótkizý úshin 15 million teńge bólgen 2000 jyly bitirgen túlekterge, Qalaýsha Begaliev atyndaǵy aýditoriiany 12 million teńgege qarjylandyrǵan 1982 jylǵy túlek Baqytbek Begalievtiń de úlesi atap ótildi.
Oqý aýditoriiasyna 10 million teńgege jóndeý jumystaryn júrgizgen Geografiia jáne týrizm kafedrasynyń 20 jyldyq túlegi Nurjan Alagózovtiń, №16 stýdentter úiiniń 2-6 qabatyndaǵy ashanany asúi jihazy jáne turmystyq tehnikamen qamtamasyz etken Ekonomika jáne biznes joǵary mektebiniń 2014 jylǵy túlegi Aidana Sydyqovanyń da demeýshiligine rizashylyq tanytty.
Sońynan ýniversitettiń damýyna eleýli úles qosqan túlekterge «Farabi» altyn medali, «Eren eńbegi úshin» medali jáne Alǵyshattar tapsyrdy.
Esterińizge sala ketsek, QazUÝ-da ótken Túlekter kúnine memleket jáne qoǵam qairatkerleri, aqyn-jazýshylar, diplomattar, respýblikalyq gazet-jýrnaldardyń bas redaktorlary, belgili ǵalymdar men professorlar qatysty.
Biyl Ál-Farabi atyndaǵy QazUÝ-dy 6573 túlek bitirip otyr. Onyń ishinde – 5410 bakalavr, 1163 magistrant.
Ál-Farabi atyndaǵy QazUÝ-dyń Baspasóz qyzmeti
