Almaty ákimi Darhan Satybaldy jumys sapary barysynda Kóktóbedegi sholý alańyna baryp, qalanyń syrtqy jaryq berý júiesin jańǵyrtý arqyly túngi kórinistiń qalai ózgerip jatqanyn kórdi. Shahar basshysyna «Almaty Qala Jaryq» MKK direktory Igor Mysik atqarylǵan jumystar men aldaǵy jospar týraly baiandady,- dep habarlaidy Dalanews.kz
«Almaty Qala Jaryq» MKK málimetinshe, 2025 jyldyń alǵashqy bes aiynda Almatyda 13 myńnan astam sham aýystyrylyp, 120 shaqyrym jaryq jelisi qalpyna keltirilgen. 520 syrtqy jaryqtandyrý basqarý shkafy (ShÝNO) jańartylyp, buryn jaryq bolmaǵan 21 aýmaqta jańa jeliler salynǵan. Bul jumystar qalanyń ortalyǵynan shetki aýdanǵa deiingi jerlerdi qamtidy.
Jyl sońyna deiin jospar boiynsha 1200 jańa jaryq jelisi salynyp, qarańǵy aýmaqtarǵa 22 myńnan astam sham ornatylmaq. Bul ýchaskeler turǵyndardyń ótinishi men mamandar júrgizgen tekseris barysynda anyqtalǵan.
Sonymen qatar, jaryq sapasyn arttyrýǵa baǵyttalǵan keshendi jumystar jalǵasyp otyr. Atap aitqanda, 70 shaqyrym jaryq jelisi jańartylyp, 1100 basqarý shkafy aýystyrylyp, 70 nysanǵa sáýlettik jaryq ornatylady. Magistraldy kóshelerge 5000-nan astam energiia únemdeitin sham qoiylady. Bul jumystyń nátijesinde biyl jyl sońyna deiin Almatyda jaryqtandyrý deńgeii 100 paiyzǵa jetýi tiis.
Shahar basshysy keshqurym qalanyń túrli aýmaǵynda júzege asyrylyp jatqan jobalardy aralap shyqty. Tekseris barysynda Darhan Satybaldy Abylai han men Abai kóshelerindegi jaryqtandyrý júiesin kórdi. Bul kóshelerde uzartylǵan kronshteinder qoldanylyp jatyr – oǵan aǵashtyń japyraǵy kedergi keltirmeidi, jaryq trotýarǵa tolyq túsedi ári onyń jasyl jelekke ziiany joq.
Panfilov kóshesinde ákim «Halyq qatysatyn biýdjet» baǵdarlamasy aiasynda júzege asyrylǵan aýla jaryǵyn qarap shyqty. Sondai-aq, 28 gvardiiashy-panfilovshylar atyndaǵy saiabaqtaǵy zamanaýi, energiia únemdeitin shamdar men Ofitserler úiiniń sáýlettik-kórkem jaryqtandyrýyn kórdi.
Darhan Satybaldynyń aitýynsha, jaryqtandyrý jumystary júieli túrde júrgizilýi tiis. Ásirese, adamdar keshke balalarymen serýendeitin nemese úiine qaitatyn turǵyn úiler mańyndaǵy aýmaq, trotýar men saiabaq jaryq ári qaýipsiz bolýy qajet. Sondai-aq, Almaty ákimi mektep, emhana, mádeni nysan men qoǵamdyq kólik aialdamasyna baratyn joldardyń jaryǵyn muqiiat pysyqtap, qarańǵy aýmaqtarǵa jeli tartý jumystaryn jedeldetýdi tapsyrdy.
Aita keteiik, búginde shaharda kún saiyn 40-tan astam arnaiy brigada jumys isteidi. Olar jańa jelilerdi ornatyp, aqaýlardy joiady ári jabdyqtardy josparly túrde aýystyrady. Aýa raiy qolaisyz kezde brigada sany kóbeiip, shuǵyl túrde turǵyndardyń ótinishine qulaq asady.
