Jezqazǵanda Ustaz Ulytau pedagogikalyq transformatsiia ortalyǵynyń bes jyldyǵyna arnalǵan mereitoilyq jiyn ótti, dep habarlaidy dalanews.kz.
«Damý traektoriiasy: jańa múmkindik» atty taqyryppen uiymdastyrylǵan is-sharaǵa qatysýshylar atqarylǵan jumysty qorytyndylap, bilim berý salasyn damytýdyń ózekti máselelerin talqylady.
Sondai-aq mektep, pedagog, sarapshy jáne memlekettik organdar arasyndaǵy yntymaqtastyqtyń aldaǵy baǵyttaryn aiqyndady.
Ustaz Ulytau jobasy 2021 jyly «Qazaqmys korporatsiiasy» JShS-nyń qoldaýymen iske qosyldy.
Osy ýaqyt ishinde joba kompaniiaǵa qatysy bar óńirlerdegi eń iri bilim berý bastamalarynyń birine ainalyp, Ulytaý, Qaraǵandy jáne Jambyl oblystaryndaǵy 85 mektep pen eki kolledjdi jáne eki qosymsha bilim berý uiymyn qamtityn deńgeige jetti.
Jobanyń negizgi maqsaty – turǵylyqty jerine qaramastan oqýshylardyń sapaly bilim alýyna jáne pedagogterdiń kásibi damýyna múmkindik berý. Osy maqsatta mektepterde zamanaýi bilim berý ádistemeleri engizilip, kásibi baǵdarlaý baǵdarlamalary, STEM-tásilderi men aǵylshyn tilin oqytýdyń tehnologiialary júzege asyrylýda. Sonymen qatar pedagogter men bilim berý uiymdarynyń basshylaryna arnalǵan biliktilikti arttyrý baǵdarlamalary júieli túrde júrgizilýde.
Jobanyń eń mańyzdy nátijeleriniń biri – oqýshylar men pedagogter úshin halyqaralyq bilim alý múmkindiginiń aitarlyqtai keńeiýi boldy. Bes jyl ishinde 43 oqýshy, sondai-aq ǵylymi joba baiqaýynyń jeńimpazdary men olardyń ǵylymi jetekshileri Ulybritaniiada tildik bilim berý baǵdarlamasynan ótýge qol jetkizdi. Sondai-aq 22 pedagog, úsh kásibi baǵdar berýshi maman jáne on mektep direktory halyqaralyq taǵlymdamadan ótti.
Daryndy oqýshylardy qoldaýǵa erekshe kóńil bólinýde. Joba aiasynda ótkiziletin Qanysh Sátbaev atyndaǵy himiia olimpiadasy birneshe jyldyń ishinde respýblikalyq saiystan halyqaralyq deńgeidegi bilim báigesine ainaldy. 2025 jyly olimpiadaǵa Qazaqstan men Qyrǵyzstannyń jáne Resei Federatsiiasynyń komandalary qatysty.
Jeńimpazdar men júldegerlerdiń qatarynda Ulytaý oblysynyń oqýshylary da boldy.
Pedagogterdiń kásibi qaýymdastyǵyn damytý jobanyń mańyzdy baǵyttarynyń biri bolyp qala beredi. Tájiribe almasý jáne zamanaýi basqarý tásilderin engizý maqsatynda Mektep direktorlarynyń klýby quryldy. Búginde ol 65 bilim berý uiymynyń basshysyn biriktirip otyr. Búginde jobaǵa qatysýshylardyń birqatary bilim berý júiesinde basshylyq qyzmet atqaryp júr.
Ustaz Ulytau pedagogikalyq transformatsiia ortalyǵy QR Oqý-aǵartý ministrligimen, Y. Altynsarin atyndaǵy Ulttyq bilim akademiiasymen, «Daryn» respýblikalyq ǵylymi-praktikalyq ortalyǵymen jáne elimizdiń jetekshi joǵary oqý oryndarymen turaqty negizde qarym-qatynas jasaidy. Mundai yntymaqtastyq óńirlerde zamanaýi bilim berý tájiribesin engizýge jáne bilim sapasyn arttyrýǵa yqpal etedi.
Bilim berýdi qoldaý jáne adam kapitalyn damytý «Qazaqmys» Tobynyń áleýmettik saiasatynyń mańyzdy baǵyttarynyń biri bolyp qala beredi. Ustaz Ulytau jobasy kompaniianyń jas urpaqtyń damýyna, pedagogterdiń kásibi ósýine jáne ózine qatysy bar óńirlerdegi bilim berý sapasyn arttyrýǵa baǵyttalǵan júieli jumysynyń bir bóligi bolyp tabylady.
