الماتى اكىمى دارحان ساتىبالدى جۇمىس ساپارى بارىسىندا كوكتوبەدەگى شولۋ الاڭىنا بارىپ، قالانىڭ سىرتقى جارىق بەرۋ جۇيەسىن جاڭعىرتۋ ارقىلى تۇنگى كورىنىستىڭ قالاي وزگەرىپ جاتقانىن كوردى. شاھار باسشىسىنا «الماتى قالا جارىق» مكك ديرەكتورى يگور مىسيك اتقارىلعان جۇمىستار مەن الداعى جوسپار تۋرالى باياندادى،- دەپ حابارلايدى Dalanews.kz
«الماتى قالا جارىق» مكك مالىمەتىنشە، 2025 جىلدىڭ العاشقى بەس ايىندا الماتىدا 13 مىڭنان استام شام اۋىستىرىلىپ، 120 شاقىرىم جارىق جەلىسى قالپىنا كەلتىرىلگەن. 520 سىرتقى جارىقتاندىرۋ باسقارۋ شكافى (شۋنو) جاڭارتىلىپ، بۇرىن جارىق بولماعان 21 اۋماقتا جاڭا جەلىلەر سالىنعان. بۇل جۇمىستار قالانىڭ ورتالىعىنان شەتكى اۋدانعا دەيىنگى جەرلەردى قامتيدى.
جىل سوڭىنا دەيىن جوسپار بويىنشا 1200 جاڭا جارىق جەلىسى سالىنىپ، قاراڭعى اۋماقتارعا 22 مىڭنان استام شام ورناتىلماق. بۇل ۋچاسكەلەر تۇرعىنداردىڭ ءوتىنىشى مەن ماماندار جۇرگىزگەن تەكسەرىس بارىسىندا انىقتالعان.
سونىمەن قاتار، جارىق ساپاسىن ارتتىرۋعا باعىتتالعان كەشەندى جۇمىستار جالعاسىپ وتىر. اتاپ ايتقاندا، 70 شاقىرىم جارىق جەلىسى جاڭارتىلىپ، 1100 باسقارۋ شكافى اۋىستىرىلىپ، 70 نىسانعا ساۋلەتتىك جارىق ورناتىلادى. ماگيسترالدى كوشەلەرگە 5000-نان استام ەنەرگيا ۇنەمدەيتىن شام قويىلادى. بۇل جۇمىستىڭ ناتيجەسىندە بيىل جىل سوڭىنا دەيىن الماتىدا جارىقتاندىرۋ دەڭگەيى 100 پايىزعا جەتۋى ءتيىس.
شاھار باسشىسى كەشقۇرىم قالانىڭ ءتۇرلى اۋماعىندا جۇزەگە اسىرىلىپ جاتقان جوبالاردى ارالاپ شىقتى. تەكسەرىس بارىسىندا دارحان ساتىبالدى ابىلاي حان مەن اباي كوشەلەرىندەگى جارىقتاندىرۋ جۇيەسىن كوردى. بۇل كوشەلەردە ۇزارتىلعان كرونشتەيندەر قولدانىلىپ جاتىر – وعان اعاشتىڭ جاپىراعى كەدەرگى كەلتىرمەيدى، جارىق تروتۋارعا تولىق تۇسەدى ءارى ونىڭ جاسىل جەلەككە زيانى جوق.
پانفيلوۆ كوشەسىندە اكىم «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلعان اۋلا جارىعىن قاراپ شىقتى. سونداي-اق، 28 گۆاردياشى-پانفيلوۆشىلار اتىنداعى ساياباقتاعى زاماناۋي، ەنەرگيا ۇنەمدەيتىن شامدار مەن وفيسەرلەر ءۇيىنىڭ ساۋلەتتىك-كوركەم جارىقتاندىرۋىن كوردى.
دارحان ساتىبالدىنىڭ ايتۋىنشا، جارىقتاندىرۋ جۇمىستارى جۇيەلى تۇردە جۇرگىزىلۋى ءتيىس. اسىرەسە، ادامدار كەشكە بالالارىمەن سەرۋەندەيتىن نەمەسە ۇيىنە قايتاتىن تۇرعىن ۇيلەر ماڭىنداعى اۋماق، تروتۋار مەن ساياباق جارىق ءارى ءقاۋىپسىز بولۋى قاجەت. سونداي-اق، الماتى اكىمى مەكتەپ، ەمحانا، مادەني نىسان مەن قوعامدىق كولىك ايالداماسىنا باراتىن جولداردىڭ جارىعىن مۇقيات پىسىقتاپ، قاراڭعى اۋماقتارعا جەلى تارتۋ جۇمىستارىن جەدەلدەتۋدى تاپسىردى.
ايتا كەتەيىك، بۇگىندە شاھاردا كۇن سايىن 40-تان استام ارنايى بريگادا جۇمىس ىستەيدى. ولار جاڭا جەلىلەردى ورناتىپ، اقاۋلاردى جويادى ءارى جابدىقتاردى جوسپارلى تۇردە اۋىستىرادى. اۋا رايى قولايسىز كەزدە بريگادا سانى كوبەيىپ، شۇعىل تۇردە تۇرعىنداردىڭ وتىنىشىنە قۇلاق اسادى.
