Qazaqstan Respýblikasy Ishki ister ministrligi óskeleń urpaqty patriottyq rýhta tárbieleýge, olardyń quqyqtyq mádenietin qalyptastyrýǵa, azamattyq jaýapkershiligin arttyrýǵa jáne zańǵa qurmet sezimin nyǵaitýǵa baǵyttalǵan "Jas saqshy" politsiia synyptaryn damytý boiynsha júieli jumysty jalǵastyryp jatyr, dep habarlaidy dalanews.kz.
Búginde elimiz boiynsha 267 "Jas saqshy" synyby bar. Onda bes myńnan astam oqýshy bilim alady. Bul joba qoǵamdyq qaýipsizdik máselesine nazar aýdaryp, elge qyzmet etýge jáne quqyq qorǵaý salasyna qyzyǵýshylyq tanytatyn belsendi jastardy bir ortada biriktiredi.
Politsiia synyptaryndaǵy oqý úderisi oqýshylardyń kóshbasshylyq qasietterin, tártibin, memlekettik rámizder men ulttyq qundylyqtarǵa degen qurmetin damytýǵa yqpal etip, el bolashaǵyna jaýapkershilikpen qaraýǵa úiretedi. Quqyqbuzýshylyqtardyń aldyn alýǵa, zańǵa baǵynatyn minez-qulyqty tárbieleýge jáne jastar arasynda politsei mamandyǵyn nasihattaýǵa erekshe nazar aýdarylady.
2025-2026 oqý jylynda jalpy sany 52 oqýshydan turatyn úsh "Jas saqshy" synybynyń túlekteri mektep bitirdi. Olar endi Ishki ister ministrliginiń vedomstvolyq joǵary oqý oryndarynda bilim alýǵa nietti. Bul joba ishki ister organdary úshin kadrlyq rezerv qalyptastyrýda óziniń joǵary tiimdiligin kórsetip otyr.
Óńirlerde politsiia synyptarynyń alǵashqy túlekteriniń mekteppen qoshtasý rásimderi ótti. Almaty qalasynda politsiia departamentiniń bastyǵy Aidyn Qabduldinov "Jas saqshy" synyptarynyń túlekterine sertifikattardy saltanatty túrde tabystap, olardyń patriotizm men quqyqtyq mádenietti nyǵaitýǵa qosqan úlesin erekshe atap ótti.
Aqtóbe oblysynda politsiia departamentiniń bastyǵy Qaiyrken Áliev te beiindik synyp túlekterine sertifikattar tabystap, jastardy azamattyq jaýapkershilik jáne qoǵamǵa qyzmet etý rýhynda tárbieleýdiń mańyzdylyǵyna toqtaldy.
"Jas saqshy" politsiia synyptaryn damytý Ishki ister ministrliginiń jastardy patriotizm, zań jáne quqyqtyq tártipti qurmetteý rýhynda tárbieleýge baǵyttalǵan mańyzdy jumystarynyń biri bolyp qala beredi.
