Búgin Qalalyq mádeniet jáne demalys saiabaǵynda Dúniejúzilik qorshaǵan ortany qorǵaý kúni men Ekologtar kúnine arnalǵan saltanatty jiyn ótti. Is-sharaǵa memlekettik mekemelerdiń, óndiris oryndarynyń ekolog mamandary, ardagerler men qoǵam ókilderi qatysty,- dep habarlaidy Dalanews.kz
Is-shara aiasynda qala mektepteriniń oqýshylary arasynda uiymdastyrylǵan «Qaita óńde – Qaita ómir syila» atty shyǵarmashylyq kórme kórermen nazaryna usynyldy. Kórmede balalar turmystyq qaldyqtar men qaita óńdeletin materialdardan jasalǵan buiymdaryn kópshilik nazaryna usyndy.
Oqýshylar óz qiialdary men ekologiialyq bilimin ushtastyra otyryp, plastik bótelkelerden jasalǵan gúlder, kartonnan qurastyrylǵan maketter, qaǵazdan jasalǵan sándik buiymdar men turmystyq qoldanýǵa arnalǵan ydystardy kórsetti. Bul kórme – balalardyń tabiǵatty qorǵaýǵa, qaldyqtardy suryptap paidalanýǵa degen kózqarasyn qalyptastyrýǵa baǵyttalǵan mańyzdy bastama boldy.
Qatysýshylar men kórermender balalardyń eńbegine joǵary baǵa berip, qorshaǵan ortany aialaýǵa úles qosyp júrgen jas urpaqtyń belsendiligin atap ótti.
Saltanatty jiyn barysynda qorshaǵan ortany qorǵaý salasyna úles qosyp júrgen birqatar mamandar Qazaqstan Respýblikasy Ekologiia jáne tabiǵi resýrstar ministrligi tarapynan marapattaldy:
- «Eńbek ardageri» medalimen BQO ekologiia departamentiniń zeinetkeri Ótepbergen Ihsanuly Muqanov;
- «Ekologiia salasynyń úzdigi» tósbelgisimen – bas mamandar Tólegen Saǵynǵaliuly Baqtyǵaliev pen Ainagúl Saǵidollaqyzy Kenjina;
- Qurmet gramotalarymen «Jaiyqmunai» JShS-niń departament direktory Dáýlet Maratuly Tólegenov jáne «KPO b.v.» kompaniiasynyń bólim basshysy Elena Aleksandrovna Pochitalina;
- Alǵys hattarmen – «Jaiyqjylýqýat» AQ injener-ekology Altynai Bazarbaiqyzy Shunaeva, «ALTRA TYRES» JShS ekology Diana Ravilevna Tleftinova, sondai-aq «Ekologiia-geografiialyq qoǵamynyń» basshysy Darhan Súndetqaliuly Sariev pen BQO tabiǵi resýrstar basqarmasynyń bas mamany Jadyra Amanjolqyzy Qoishekenova marapattaldy.
Jiyn barysynda Batys Qazaqstan oblysy ákiminiń orynbasary Qaliiar Shadiiaruly Aitmuhambetov sóz sóilep, qorshaǵan ortany qorǵaýdaǵy eńbegi úshin birqatar sala mamandaryna oblys ákiminiń Alǵys hattaryn tabystady. Atap aitqanda:
- Tabiǵat qorǵaý sharalary bóliminiń bas mamany Maira Ǵalymjanqyzy Maiharina;
- Jánibek aýdany ákimdigi ókili Arman Serikuly Túiebaev marapattaldy.
Memleket basshysy Qasym-Jomart Toqaevtyń“Tazalyq ár adamnan, ár úiden, árbir kóshe men ár qaladan bastalýy kerek. Óitkeni «Taza Qazaqstan» – bul bir kúndik naýqan emes, bul – bizdiń ómir saltymyz” degen sózi is-sharanyń mazmundy uranyna ainaldy.
Merekelik jiyn ekologiiany qorǵaýǵa úndeý retinde tanylyp, qatysýshylar arasynda tabiǵatqa degen jaýapkershilik sezimin arttyrdy.
