Qazaqstanda búgin jalpyhalyqtyq referendýmda qabyldanǵan jańa Konstitýtsiia resmi túrde kúshine endi, dep habarlaidy dalanews.kz.
Bul týraly konstitýtsiialyq reformalar boiynsha sarapshy Indira Rystina óziniń Facebook paraqshasynda jazdy.
Onyń aitýynsha, 2026 jylǵy 1 shilde Qazaqstannyń jańa saiasi damý kezeńiniń bastalǵan kúni retinde tarihta qalmaq. Búginnen bastap el jańa konstitýtsiialyq model jaǵdaiynda ómir súre bastaidy. Konstitýtsiia kúni endi 15 naýryzda atalyp ótse, 1 shilde jańa Ata Zańnyń praktikalyq kezeńi bastalǵan tarihi kún retinde baǵalanady.
Sarapshynyń pikirinshe, referendýmnan keiin birneshe ai boiy konstitýtsiialyq zańdar qabyldanyp, memlekettik basqarýdyń jańa arhitektýrasyn qamtamasyz etetin quqyqtyq baza qalyptastyryldy. Endigi negizgi mindet – jańa saiasi modeldiń tolyqqandy jumys isteýin qamtamasyz etý.
Indira Rystina sońǵy alty jylda saiasi júieni jańǵyrtýǵa baǵyttalǵan aýqymdy reformalar júrgizilgenin atap ótti. Onyń ishinde azamattyq qoǵam institýttarynyń kúsheiýi, saiasi partiialar týraly zańnamanyń jańarýy jáne partiialardy tirkeý talaptarynyń jeńildetilýi jańa saiasi kúshterdiń qalyptasýyna múmkindik bergen.
Sarapshy jańa Konstitýtsiia jaǵdaiynda saiasi partiialardyń róli túbegeili ózgeretinin aitady. Quryltai depýtattarynyń tolyqtai partiialyq tizim boiynsha sailanýy partiialardyń memlekettik saiasat pen eldiń strategiialyq damýyna jaýapkershiligin kúsheitedi.
Sondai-aq ol Memleket basshysynyń keshe Parlament palatalarynyń birlesken otyrysynda «AMANAT» pen «Ádilet» partiialarynyń reformalardy iske asyrýdaǵy rólin arnaiy atap ótýin jańa saiasi model jaǵdaiyndaǵy mańyzdy saiasi signal retinde baǵalady.
Jazba sońynda Indira Rystina jańa Konstitýtsiianyń basty ereksheligi memleket pen qoǵamnyń ózara jaýapkershiligine negizdelgen jańa saiasi mádenietti qalyptastyrý ekenin aityp, 23 tamyzda ótetin Quryltai sailaýy osy ózgeristerdiń alǵashqy iri synaǵy bolatynyn atap ótti.
