Teńdesi joq operasıa zaly
Taldap, tarqatyp aıtar bolsaq, birneshe jyl buryn ǵana jurttyń paıdalanýyna berilgen Semeı qalasyndaǵy jedel medısınalyq járdem aýrýhanasynda ashylǵan gıbrıdti operasıa zaly aldymen aýyzǵa iligetini anyq. Onyń ózindik syry bar. Atalmysh zal klasıkalyq ota jasaıtyn bólmeden anaǵurlym úlken, ári múmkindigi de zor.
Aıtalyq, kóp júıeli blokta jańa medısınalyq tehnologıalar men qural-jabdyqtar, ashyq jáne shaǵyn ınvazıvti laparoskopıalyq magnıtti-rezonansty tomografıa, hırýrgıalyq rentgen júıeleri, ÝDZ salasy, beınebaqylaý júıesi arqyly kúrdeli otany sapaly jasaýǵa múmkindik beredi.
Jańa zamanaýı medısınalyq tehnologıa Semeı óńiri men oblys turǵyndaryn joǵary medısınalyq kómekpen tolyqtaı qamtamasyz etip otyr. Bul halyq ıgiligi úshin jasalǵan mańyzdy sharýalardyń biri. Gıbrıdti zal joǵary tehnologıalyq sapaly standart retinde respýblıkadaǵy jalǵyz keshen. Mamandardyń baǵalaýynsha, Semeıdegi jańa medısınalyq nysan JCI standarty boıynsha jobalanyp, jabdyqtalǵan elimizdegi birden-bir nysan bolyp tur.
Dáriger biliktiligin kóterý mańyzdy mindet
Shyǵys Qazaqstan oblysyndaǵy dárigelerdiń medısınasy damyǵan elderge baryp, mol tájirıbe alamasyp, biliktiligin kóterý isi de jolǵa qoıylǵanyn aıta ketýimiz kerek.
Bıyl jyl basynda SHQO ákimi Danıal Ahmetov halyqpen esepti kezdesýinde oblystaǵy medısınalyq mekemelerdi halyqaralyq «Altyn standart» – Joint Commission International sáıkestigine akredıtasıalaý júrgizilgenin tilge tıek etken bolatyn.
Qazirgi tańda óńirde jańa robotty hırýrgıa jáne transplantologıa, polıtravma, ortopedıa ortalyqtary, gıbrıdti operasıalyq zal, úshinshi deńgeıli ınsýlt ortalyǵy, Altaı men Aıagóz qalalaryndaǵy ekinshi deńgeıli ınsýlt ortalyqtary tabysty jumys isteýde. Dárigerlerdi oqytýdyń úshdeńgeıli baǵdarlamasyn júzege asyrý jalǵasyp keledi.
Búginde 5,5 myń maman biliktilikterin kóterdi, onyń ishinde bastapqy býynnyń 3700 dárigeri Semeı qalasyndaǵy medısınalyq ýnıversıtettiń jáne respýblıkalyq ǵylymı zertteý ınstıtýttarynyń bazasynda qaıta oqytylsa, 1535 dáriger qazaqstandyq jáne halyqaralyq mamandar tartylǵan 91 sheberlik-synybyna qatyssa, 276 maman Ulybrıtanıa, Germanıa, Japonıa, Italıa, Polsha, Lıtva jáne Izraıl emhanalarynda biliktilikterin kótergen bolatyn.
Aýrý-syrqaý azaıyp keledi
Shyǵys Qazaqstan oblysyndaǵy osyndaı keshendi jumystardyń arqasynda sońǵy bes jyl ishinde turǵyndardyń medısınalyq qyzmettiń sapasyna qanaǵattaný deńgeıi 39,5-ten 51,3 paıyzǵa deıin artty. Al qaterli isiktiń paıda bolýyn erte bastan anyqtaý 6-dan 24 paıyzǵa deıin artty.
Budan bólek, Ulttyq kardıologıa ǵylymı ortalyǵy oblystyq aýrýhanmen, Travmatologıa ınstıtýty men Ulttyq neırohırýrgıa ǵylymı ortalyǵy Semeı qalasyndaǵy Jedel medısınalyq járdem aýrýhanasymen, A.N.Syzǵanov atyndaǵy Ulttyq hırýrgıa ǵylymı ortalyǵy oblystyq mamandandyrylǵan medısınalyq ortalyqpen, Ulttyq akýsherlik jáne gınekologıa ǵylymı ortalyǵy Ana men bala ortalyǵymen, Qazaq onkologıa jáne radıologıa ǵylymı-zertteý ınstıtýty Óskemen qalasyndaǵy onkologıa jáne hırýrgıa ortalyǵymen ózara áriptestik jóninde memorandýmdar bekitti.
Nurlan ÁÝBÁKİR
