Abai oblysynyń ákimi Berik Ýáli Semei qalasyndaǵy mádeni nysandardy aralap, ózekti máselelerimen tanysty,– dep habarlaidy Dalanews.kz
Aimaq basshysy áýeli Abai mýzeiine bardy. 1940 jyly ashylǵan mádeni nysannyń oblys aýmaǵynda 9 filialy jumys isteidi. Mýzei qorynda 22 myń jádiger bar.
Oblys ákimi mýzeidiń qor saqtaý bólimi men kitaphanasyn aralap kórdi. Qor saqtaý bólmesinde 20 myńnan astam jádiger, kitaphanada 16 myńnan astam kitap saqtalǵan. Kitaphana ashylǵaly beri jóndeý kórmegen. Jertólede ornalasqandyqtan syz tartyp, qundy kitaptar men jádigerler búline bastaǵan.
«Jidebai-Bórili» memlekettik tarihi-mádeni mýzeiiniń direktory Ulan Saǵadiev aimaq basshysyna Jidebaidaǵy qoryqty qorshaý, Abai-Shákárim kesenesine jáne filialǵa qarasty aýdandardaǵy mýzeilerge jóndeý júrgizýge kómek kórsetýdi surady.
Oblys ákimi mýzeide abaitanýshy Arap Espenbetov jáne belgili aqyn Tynyshtyqbek Ábdikákimovpen kezdesti. Ziialy qaýym ókilderi óńirdiń rýhaniiaty men mádenietine qatysty oilaryn ortaǵa saldy. Mádeni nysanǵa ulttyq mártebe berý jóninde usynystaryn aitty. Aimaq basshysy usynystardy eskerip, birlese jumys isteýge daiyn ekenin jetkizdi.
Nevzorovtar otbasy atyndaǵy beineleý óneri mýzeii 1870 jyly salynǵan. 600-den astam qundy jádiger saqtaýly. Munda 72 adam eńbek etedi. Nysan kúrdeli jóndeýdi qajet etedi. Ǵimarattyń qasbeti, edeni eskirip, keibir bólmelerdiń qabyrǵalarynda jaryq paida bola bastaǵan. Qalypqa keltirý úshin ǵylymi-jobalyq qujattama ázirlengen.
1883 jyly qurylǵan tarihi-ólketaný mýzeii - elimizdegi eń kóne mádeni nysandardyń biri. Mekemede 81 qyzmetker eńbek etedi. Aýdandarda 5 filialy bar. Mundaǵy ózekti másele - ǵimarattyń tarlyǵy. Qorda saqtalǵan 137 myńǵa jýyq jádiger sý, jylý qubyrlary ótetin eski jertólede ornalasqan.
Fedor Dostoevskii atyndaǵy ádebi-memorialdyq mýzei 1971 jyly jazýshynyń 150 jyldyǵyna orai ashylǵan. Qalamgerdiń qundy málimetteri saqtalǵan úzdik úsh mýzeidiń qataryna kiredi. Munda XVIII-XIX ǵasyrlardaǵy sirek kitaptar men qundy jádigerler saqtalǵan. Jalpy sany 27 myńnan astam eksponatty tsifrlyq formatqa kóshirý úshin arnaiy skaner qajet. Bul ǵimaratqa da kúrdeli jóndeý júrgizilmegen. Shatyrdan sý aǵyp, ekspozitsiialyq jabdyqtar men monýmentaldy sýretterge zalal kelgen.
Nevzorovtar otbasy atyndaǵy beineleý óneri mýzeiiniń direktory Tatiana Stromskaia men Fedor Dostoevskii atyndaǵy ádebi-memorialdyq mýzeiiniń direktory Irina Soloveva oblys ákimine ózderi basqaryp otyrǵan mekemelerdiń ǵimarattaryn keńeitý, damytý boiynsha usynystaryn aitty.
Aimaq basshysy qaladaǵy mádeni nysandarǵa kezeń-kezeńimen jańǵyrtý júrgiziletinin atap ótti.
«Búgin Semeidegi mýzeilerdiń tynys-tirshiligimen, ózekti máselelerimen tanystym. Bul mádeni nysandar osy ýaqytqa deiin ábden qaraýsyz qalǵan eken. Barlyǵy kúrdeli jóndeýdi qajet etedi. Jertólege túsip, qundy jádigerlerdiń qazirgi jaǵdaiyn kórdim. Ókinishke qarai, kún ótken saiyn tozyp, búlinip barady. Zaman talabyna sai jabdyqtamasaq, baǵaly muralarymyzdan aiyrylyp qalýymyz múmkin. Sondyqtan mýzeilerdi jóndeýdi biyldan bastaimyz»,- dedi oblys ákimi.
