Prezident Qasym-Jomart Toqaev jastarǵa ún qatty, dep habarlaidy Dalanews.kz.
Memleket basshysy Qasym-Jomart Toqaev "Altyn sapa" jáne "Paryz" syilyǵynyń laýreattaryn, "Qazaqstannyń úzdik taýary" respýblikalyq kórme konkýrsynyń jeńimpazdaryn marapattaý rásiminde sóz sóiledi.
"Qazir álemde bolyp jatqan úderisterdi bárińiz de kórip-bilip otyrsyzdar. Geoekonomikalyq ahýal óte qubylmaly ári bulyńǵyr. Osyndai kezeńde biznes ókilderiniń jasampazdyq, otanshyldyq qasietteri aiqyn kórinedi. Mundai ýaqytta kásipkerlerimizdiń tabandy eńbegi jáne el bolashaǵyna degen zor senimi asa mańyzdy ekeni anyq. Túptep kelgende, sapaly ónim shyǵaryp, sapaly qyzmet kórsetý – básekege qabiletti bolý jáne eń bastysy, elimizdiń órkendeýine naqty ispen úles qosý degen sóz. El Prezidenti retinde kásipkerlerge, ulttyq býrjýaziiamyzǵa, sonyń ishinde, eń aldymen, osy zalda otyrǵan biznes qoǵamdastyqtyń ókilderine shynaiy qurmetpen qaraimyn. Sizderdiń qabiletterińizge, iskerlik jáne adamgershilik qasietterińizge senemin. Sizder memleketimizdiń igiligi, ekonomikalyq áleýeti úshin tabandy eńbek etip kele jatqan Qazaqstannyń naǵyz patriotysyzdar. Sizder jetistikke jetýden shabyt alatyn, ózgelerge úlgi bolatyn azamatsyzdar. Ár qadamdaryńyz sátti bolatynyna senimdimin", - dedi Toqaev.
Prezidenttiń pikirinshe, qandai da bir iste bolsyn, pessimizmge boi aldyratyn, áreketsiz, qulyqsyz, ishi tar adamdardyń jetistikke jetpeitini erteden belgili.
"Muny, ásirese, áleýmettik jelide ýaqytyn ótkizip jatqan jastar bilýi ári este saqtaýy kerek. Shyǵys danalyǵy eń qiyn jaǵdaidyń ózinde úlken múmkindikter jasyrynyp jatatynyn aitady. Sondyqtan eńseni túsirip, kúizeliske berilýdiń qajeti joq. Kerisinshe jetistikke jetetin jol izdeý kerek", - dedi Toqaev.
