Orta Aziia, onyń ishinde Qazaqstandaǵy Kreml kózqarasyna qaishy kontentti súzip otyratyn IA-CENTR ortalyǵy Kievke baryp qaitqan qazaq delegatsiiasynyń saparynan sebep izdepti.
Marǵulan Seisembaimen ilese barǵan delegatsiia quramynda ekonomist Oljas Qudaibergen, Ulttyq keńestiń eks-múshesi Arman Shoraev, eks-depýtat Baqyt Syzdyqova, jýrnalist Vadim Boreiko syndy tanymal azamattar boldy.
Seisembai men Saakashvilidiń tym shúiirkelesip ketkeninen sekemdengen maqala avtory «qazaqtar Ýkrainaǵa qandai maqsatpen barǵanyn tis jaryp aitpady» deidi.
«Bul sapar ánsheiin oi-pikir almasý, jái ǵana dáris tyńdaýmen shektelmegeni anyq. Olar ol jaqtan qur qol oralǵan joq. Saakashvilidiń sóz yńǵaiyna qaraǵanda, Qazaqstanda onyń atymen atalatyn ortalyq ashylmaq. Buǵan delegatsiianyń qolqalaýymen kóngen kórinedi.
Tap sol kúni taǵy bir málimdeme jasady. Grýziiaǵa qaityp oralyp, sailaýda baǵyn synap kórmekke bekingenin málim etti. Onyń bulaisha oraǵytýy tegin emes...» deidi IA-CENTR.
Maqala avtory Qazaqstanda qurylatyn Saakashvili ortalyǵyn Marǵulan Seisembai qarjylandyraryna senimdi. Baiqaýymyzsha, Kreml bul ortalyqtan bálendei qaýip kútpeidi, onyń ýaiym-qaiymy – Ulttyq keńes.
Saakashvilimen syilastyq odan ári tereńdep, Ulttyq keńeske ótip kete me dep alańdaityn syndy.
«Saakashvili men Toqaevtyń kómekshisi (Erlan Qarin, red.) Ýkraina men Qazaqstandaǵy attas uiymdardy áriptestirý týraly ýaǵdalasýy múmkin. Mundai boljam jasaýǵa birneshe sebep bar.
Osy sapardyń sarynyn muqiiat zertter bolsańyz, Kievke kelgen bir top qazaq liberaldary Saakashvilidiń «batasyn» alyp qaitqanǵa kóbirek uqsaidy.
Saiasattaǵy alǵashqy aiaq alysyn Grýziianyń eks-prezidentimen aqyldasyp baryp jasaǵandy jón kórgendei» deidi maqala avtory.
Reseilik aqparat ortalyǵy osy sapardy osydan eki jyl buryn qurylǵan «Jańa Qazaqstanmen» salystyrypty.
Sol joly bir top qazaq saiasatkerleri men qoǵam belsendileri qýǵyndaǵy Qajygeldinmen júzdesip, jańa uiymnyń tusaýyn kesken. «Jańa Qazaqstannyń» ǵumyry uzaqqa sozylǵan joq, sailaýdan soń uiym músheleri jan-jaqqa bytyrap ketti.
Reseilik agenttik Qosanovtyń sailaýdaǵy utylysyn saiasatkerdi ultshyl-liberaldardyń qoldaýymen bailanystyryp, halyqtyń ustanymy buǵan qarsy degenge keltiripti.
Maqala avtory Marǵulan Seisembai men Muhtar Taijannyń arasyndaǵy arazdyqty mysalǵa keltirip, milliarderdiń ótkenin qoparǵan eken.
Sóz oraiynda Saakashvilidiń reformalaryn iske alǵysyz etip, qazaqtardyń odan úireneri shamaly degenge saiǵyzypty.
«Onyń tóńiregindegi ańyz saiasattaǵy saýatsyz júristerin tumshalap tastaǵan. Halyq onyń ústinen qushaq-qushaq qylmystyq is qozǵalǵanyn, týǵan eli teris ainalǵanyn, Ýkrainada basy daýǵa qalyp, basy aýǵan jaqqa bosyp ketkenin umytyp qaldy. Óz galstýgin ózi shainaǵan shaipaý minezdi adamnan qandai reforma kútesiz?
Sol Saakashvili áigili Marǵulan Seisembaimen ámpei-jámpeilesip, arasynan qyl ótpes dos bolýǵa sóz bailasypty...» deidi maqala avtory.
Seisembaidyń Saakashvilidiń seriktesi atanǵany ras. Muny el-jurtqa ózi habarlap, budan bylai Saakashvilimen qoiyn-qoltyqtasyp jumys isteitinin, Ýkraina men Qazaqstannyń arasynda qatynap turatynyn jazǵan-tuǵyn.
1Oǵan barynsha qoldaý kórsetetin bolamyn. Ýkrainanyń jarqyn bolashaǵy úshin birlese qareket etemiz. Bul meniń Qazaqstannan ketkenimdi bildirmeidi» degen milliarder.
Reseilik agenttik munyń astarynda úlken saiasattyń buǵyp jatqanyna senimdi. Avtordyń paiymdaýynsha, Qazaqstanda jańa partiia qurylady. Osy ideianyń tóbe basynda turǵandar osynaý ulyǵaýsar mindetti Marǵulan Seisembaiǵa senip tapsyrmaq. «Jańa Qazaqstannyń» qolynan kelmegendi Seisembaidyń iske asyraryna úmitti. Kievke kelip, Saakashvilidiń aq batasyn alyp qaitqan delegatsiia ókilderi bolashaqtaǵy jańa saiasi partiianyń serkeleri bolmaq.
«Nur Otannyń» sailaýdaǵy opponenti mindetin oidaǵydai oryndaýy tiis.
Biz bilsek, bilik parlament sailaýyn keler jylǵa shegerýi múmkin. Jańa partiia qurý úshin shamaly ýaqyt kerek.
Másele bul ideia iske asa ma, joq pa? Eki qoshqardyń basy bir qazanǵa syia qoiar ma? Kievten oralǵan delegatsiia músheleri kórpeni ózine tartyp, aqyr sońy arazdasyp tynýy múmkin. Delegatsiia quramynda keibir azamattardyń halyqqa qaiyr qylǵany shamaly. Kerisinshe, sońynan sóz ergen aiyp-anjysy kóp» deidi avtor.
Seisembaidyń Saakashvilige sapary orystildi Telegram arnalarda qyzý talqylanýda. Dalanews aldaǵy ýaqytta ol jaqqa da sholý jasap, súzgiden ótkizetin bolady.
Al FREDO
