Qala ákimi Murat Áitenov Shymkenttegi qaptaǵan toihanalardy bilim ordalaryna ainaldyrýdy usynǵan.
"Shymkent qalasyndaǵy 147 memlekettik mekteptiń 19-y úsh aýysymda. Jylyna oqýshylar sany 12 myń balaǵa artyp otyr. Qosymsha bilim turmaq, negizgi bilimdi qamtý úshin jyl saiyn qanshama mektep salý kerek.
Ákim oilanyp otyrdy da, «Osy qazir toihanalar jabyq. Qashan ashylatyny belgisiz. Solardyń ielerimen sóilesińder. Olardyń birqataryn qosymsha bilim berý uiymdaryna ainaldyraiyq» dep tapsyrdy", – deidi Shyńǵys Muqan.
Qala ákiminiń birinshi orynbasary prezident Toqaevtyń indettiń áli eki jylǵa sozylýy múmkin degen sózin nazarǵa alyp, oǵan deiin halyq toidy shaǵyndap ótkizýdi ádetke ainaldyraryna senim bildiripti.
Shyńǵys Muqannyń boljamynsha budan bylai úlken toihanalar burynǵydai suranysqa ie bolýy neǵaibyl. Onyń ústine, adamdar kópshilik jerge barýǵa aiaq tartyp qalǵan.
"Osyndaida Shymkenttegi 134 toihananyń taǵdyry ne bolmaq? Bos tura bere me, álde qoǵamǵa basqalai qyzmet ete me?
Mysaly, mańdaiyna «Saltanat» toihanasy dep jazylyp turǵannan, sol ǵimaratqa Bilim saraiy dep jazyp qoisa, qandai keremet! Tipti Bilim saraiyna iesiniń atyn bersin.
Meniń oiymsha, toihanalardy oihanalarǵa oinaldyrýdyń joldary mynalar:
- Coworking center
- Jastar ortalyǵy
- Shyǵarmashylyq ortalyǵy
- Oqýshylar saraiy
- IT hub
- Óner saraiy
- Dombyra ortalyǵy
- Sheberler mektebi
- STEM center
Toihanalardy jastardyń áleýetin arttyratyn ortalyqqa ainaldyrýdyń túri kóp", – deidi Shyńǵys Muqan. Buǵan Almatydaǵy SmART POINT koýorking ortalyǵyn mysalǵa keltirgen ol, atalǵan ortalyqtyń búgingi kúni elimizdegi jetekshi IT hub-qa ainalǵanyn tilge tiek etipti.
Toihana biznesinen bas tartyp, iri saltanat sarailaryn óz erkimen mektepke ainaldyryp jatqan kásipkerler de bar. Shyńǵys Muqannyń habarlaǵanyndai qazir "Nursát" yqsham aýdanynda ornalasqan «Ońtústik» atty saltanat saraiy mektepke ainalyp jatyr.
"Bul aýdanda ornalasqan 80-mektep úsh aýysymdy. Saltanat saraiyna bardym. Sarai dese sarai. Mundai záýlim ǵimaratty mektepke ainalady dep kim oilaǵan!
Biraq bul ákimdiktiń tapsyrmasymen ashylǵan mektep emes. Toihana iesiniń óz qalaýy. Respekt. Ministrlikten litsenziia alǵan. Negizi toihanalar, ákim aitpaqshy, qosymsha bilim berý uiymdaryna, jastar ortalyǵy, kovorking ortalyqtarǵa suranyp tur. Qurmetti kásipkerler, bilim salasyna qarjy salyńyzdar. Tabysy azdaý bolar. Balalaryńyzdyń bolashaǵy jarqyn bolsyn deseńizder, bilim salasyna bas buryńyzdar. Toihanalardy oihanaǵa ainaldyryq,", – dep jazǵan eken jelidegi paraqshasynda qala ákiminiń birinshi orynbasary.
