Ekonomıs Almas Chýkın Ulttyq banktiń bazalyq mólsherlemeni 18%-ǵa deıin kóterý sheshiminiń saldaryn Facebook paraqshasynda taldady dep habarlaıdy Dalanews.kz.

Sarapshynyń aıtýynsha, mundaı joǵary mólsherleme el ekonomıkasyna aıtarlyqtaı qysym jasaıdy jáne nesıe alý múmkindigin kúrt tómendetedi.

«18% – bul óte joǵary kórsetkish, biraq tamyzdan beri baıqalǵan ınflásıanyń kúrt ósýi de eleýli qaýip týdyryp otyr. Eger Ulttyq bank qarjyny 18% mólsherlememen berse, onda komersıalyq bankter eń senimdi klıentterge de qysqa merzimge 22%-ben nesıe usynady. Al halyq úshin ıpoteka men avtonesıe 24–25%-ǵa deıin, al tutynýshylyq nesıe 40%-ǵa deıin ósedi», – deıdi ekonomıs.

Onyń sózinshe, mundaı jaǵdaıda bıznes úshin ınvestısıalyq jobalardy iske asyrý tıimsiz bolady, óıtkeni joǵary paıyzben alynǵan nesıe eshbir jobany ózin-ózi aqtaı almaıtyndaı etedi.

«Múmkin tek saýda salasynda – taýardy ákelip, ústeme qosyp, tez satyp úlgerý arqyly jumys isteý ǵana qoljetimdi bolar. Biraq mundaı “agressıvti tejegish” suranysty kúrt tómendetip, ásirese qurylys salasyna aýyr soqqy beredi. Artynsha oǵan baılanysty barlyq salalar – jóndeý, jıhaz, shaǵyn jáne orta bıznes zardap shegedi», – dep atap ótti Chýkın.

Sarapshynyń pikirinshe, mundaı «qatty sharalar» komersıalyq nesıelendirýdi, jeke bıznestiń damýyn jáne halyqtyń tutynýshylyq belsendiligin tejeıdi.

«Teorıa boıynsha, baǵanyń ósýi óndiris pen usynysty arttyrýǵa túrtki bolýy kerek. Alaıda is júzinde bizdiń kásipkerler baǵany kóterip, burynǵy kólemmen jumys isteýdi jón kóredi. Sondyqtan ınflásıanyń tabıǵı tejelý mehanızmi buzylady», – dedi Almas Chýkın óz paraqshasynda.