ەكونوميست الماس چۋكين ۇلتتىق بانكتىڭ بازالىق مولشەرلەمەنى 18%-عا دەيىن كوتەرۋ شەشىمىنىڭ سالدارىن Facebook پاراقشاسىندا تالدادى دەپ حابارلايدى Dalanews.kz.

ساراپشىنىڭ ايتۋىنشا، مۇنداي جوعارى مولشەرلەمە ەل ەكونوميكاسىنا ايتارلىقتاي قىسىم جاسايدى جانە نەسيە الۋ مۇمكىندىگىن كۇرت تومەندەتەدى.

«18% – بۇل وتە جوعارى كورسەتكىش، ءبىراق تامىزدان بەرى بايقالعان ينفلياسيانىڭ كۇرت ءوسۋى دە ەلەۋلى ءقاۋىپ تۋدىرىپ وتىر. ەگەر ۇلتتىق بانك قارجىنى 18% مولشەرلەمەمەن بەرسە، وندا كوممەرسيالىق بانكتەر ەڭ سەنىمدى كليەنتتەرگە دە قىسقا مەرزىمگە 22%-بەن نەسيە ۇسىنادى. ال حالىق ءۇشىن يپوتەكا مەن اۆتونەسيە 24–25%-عا دەيىن، ال تۇتىنۋشىلىق نەسيە 40%-عا دەيىن وسەدى»، – دەيدى ەكونوميست.

ونىڭ سوزىنشە، مۇنداي جاعدايدا بيزنەس ءۇشىن ينۆەستيسيالىق جوبالاردى ىسكە اسىرۋ ءتيىمسىز بولادى، ويتكەنى جوعارى پايىزبەن الىنعان نەسيە ەشبىر جوبانى ءوزىن-وزى اقتاي المايتىنداي ەتەدى.

«مۇمكىن تەك ساۋدا سالاسىندا – تاۋاردى اكەلىپ، ۇستەمە قوسىپ، تەز ساتىپ ۇلگەرۋ ارقىلى جۇمىس ىستەۋ عانا قولجەتىمدى بولار. ءبىراق مۇنداي “اگرەسسيۆتى تەجەگىش” سۇرانىستى كۇرت تومەندەتىپ، اسىرەسە قۇرىلىس سالاسىنا اۋىر سوققى بەرەدى. ارتىنشا وعان بايلانىستى بارلىق سالالار – جوندەۋ، جيھاز، شاعىن جانە ورتا بيزنەس زارداپ شەگەدى»، – دەپ اتاپ ءوتتى چۋكين.

ساراپشىنىڭ پىكىرىنشە، مۇنداي «قاتتى شارالار» كوممەرسيالىق نەسيەلەندىرۋدى، جەكە بيزنەستىڭ دامۋىن جانە حالىقتىڭ تۇتىنۋشىلىق بەلسەندىلىگىن تەجەيدى.

«تەوريا بويىنشا، باعانىڭ ءوسۋى ءوندىرىس پەن ۇسىنىستى ارتتىرۋعا تۇرتكى بولۋى كەرەك. الايدا ءىس جۇزىندە ءبىزدىڭ كاسىپكەرلەر باعانى كوتەرىپ، بۇرىنعى كولەممەن جۇمىس ىستەۋدى ءجون كورەدى. سوندىقتان ينفلياسيانىڭ تابيعي تەجەلۋ مەحانيزمى بۇزىلادى»، – دەدى الماس چۋكين ءوز پاراقشاسىندا.