Qazaqstanda sáýir aiynda adam saýdasyna qatysty 41 qylmys tirkeldi. Onyń ishinde kámeletke tolmaǵandarǵa qatysty 9 derek bar, dep habarlaidy Dalanews.kz.
Qazaqstan Respýblikasy Ishki ister ministrliginiń málimetinshe, bul derekter "Stop trafik" jedel-profilaktikalyq is-sharasy aiasynda anyqtalǵan.
Qyzylorda oblysynda jańa týǵan sábidi satý shemasy áshkerelendi. Politsiianyń anyqtaýynsha, 25 jastaǵy áiel bala týǵanǵa deiin jáne keiin arnaiy qoǵamdyq qorda turǵan. Keiin ol baladan bas tartýǵa sheshim qabyldaǵanda, qor jetekshisi sábidi 50 jastaǵy áielge 1 mln teńgege "asyrap alý" maqsatynda satýdy usynǵan.
"Qazirgi tańda atalǵan úsh áiel de ýaqytsha ustaý izoliatoryna qamaldy", – dedi IIM uiymdasqan qylmysqa qarsy kúres departamentiniń ókili Qýandyq Alpys.
Al Almatyda adamdardy qylmystyq maqsatta paidalanǵan uiymdasqan topqa qatysty is tergelip jatyr. Tergeý málimetinshe, qylmystyq top turaqty turǵylyqty jeri joq adamdardy taýyp, olardy túrli tásilmen ózderine táýeldi etken. Keiin olardyń atyna jalǵan nesie tarihyn qalyptastyryp, Almaty, Shymkent qalalarynda qymbat kólikter rásimdep, satqan.
Qazirgi ýaqytta negizgi uiymdastyrýshylar ustalǵan.
Jetisý oblysynda da eńbekke májbúrleý deregi toqtatyldy. 2005 jáne 2007 jyly týǵan eki jasóspirimdi urlap áketken. Olar bir ai boiy turmystyq himiia óndiretin tsehta kúsh qoldaný arqyly jumys isteýge májbúr bolǵan.
Atalǵan fakti boiynsha adamdy qanaý maqsatynda urlaý baby boiynsha qylmystyq is qozǵaldy. Kúdiktiler ýaqytsha ustaý izoliatoryna qamaldy. Zardap shekkenderge meditsinalyq kómek kórsetilgen.
