"Jer satyla ma, satylmai ma, satylsa qandai jaǵdaida satylady degen suraqtar qoiyldy. Taǵy bir jaǵdai - komissiia músheleri Qazaqstan azamattaryna jerdi satyp qana qoimai, jalǵa berý týraly normany qaldyrý máselesin de qozǵady", - dedi Saǵyntaev.
"Birden sheshim qabyldanbaityny túsinikti. Óńirlerdi aralaimyz dep kelistik. Halyqtyń pikirin tyńdap, usynysymyzdy ary qarai Parlamentke berý úshin pysyqtaimyz", - dedi ol.
Saǵyntaevtyń aitýynsha, otyrys barysynda jerdi qazaqstandyqtarǵa tegin berý máselesi de qarastyrylǵan. Ol bul suraqtyń jumys toptarynyń otyrysy barysynda qarastyrylatynyn jetkizdi.
"Komissiianyń 38 múshesi óz oilaryn jetkizdi. Eń basty saýal – jerdi satýǵa jol bermeý. Ekinshiden, ol satylatyn bolsa, qalai satylady. Atalǵan másele boiynsha oi-pikirlerdi tyńdadyq, shtab pen hatshylyq olardy saraptaityn boldy jáne ári qarai jumys tobynda talqylanady. Jer qalai satylady, qandai kólemde, sheshimdi kim qabyldaidy. Eger muny bir adam sheshse, bul alańdaýshylyq týǵyzady, qoǵam muny túsinbeidi. Satylatyn jer ákimniń nemese ókiletti tulǵanyń sheshimine bailanysty bolmaýy kerek. Sheshimdi qoǵammen birge qabyldaǵan jón. Eger qoǵam qarsy bolsa, endeshe satylmaýy tiis. Sondyqtan da qurylǵan jumys tobynda otyrys barysynda aitylǵan pikirlerdi jiti saraptaýdy suraimyn.
Kelesi otyrysta biz jerdi sheteldikterge jalǵa beremiz be, bermeimiz be, sony talqylaityn bolamyz. Sodan keiin, osy úlken eki taqyryp aitylyp, talqylanyp bitkennen soń halyqqa shyǵatyn shyǵarmyz, ol úshin de ózimizdiń pozitsiiamyz, usynysymyz bolýy kerek. Ondai usynys bolmasa jai halyqqa barý qisynsyz, olar da bizden usynys kútip otyr", - dedi Saǵyntaev.
Aita keteiik, búgingi otyrys barysynda jumys toptarynyń jetekshileri sailandy. Ekonomikalyq máselelermen Aqylbek Kúrishbev (Sáken Seifýllin atyndaǵy Qazaq agrotehnikalyq ýniversitetiniń rektory), quqyqtyq máselelermen - Muhtar Taijan, jer reformasyn túsindirýmen - Murat Ábenov, rásimderdiń zańdylyǵy men ashyqtyǵyn qamtamasyz etýmen Dos Kóshim ainalysady.
Derekkóz: tengrinews.kz
