Almatyda jalǵan aqparat taratty degen kúdikpen qamalǵan bloger Ádilethan Moldahannyń týystary Prezident Qasym-Jomart Toqaevqa, Bas prokýratýra men Ishki ister ministrligine ashyq hat joldap, ádil tergeý júrgizýdi talap etti, dep habarlaidy Dala News.
Úndeý avtorlarynyń aitýynsha, bloger qazirgi tańda Almatydaǵy SI-8 tergeý izoliatorynda otyr. Oǵan qatysty taǵaiyndalǵan saraptama nátijesi 9 sáýirge deiin shyǵýy tiis. Osy qorytyndy boiynsha onyń áreketinde qylmys quramy bar-joǵy anyqtalady.
Týystary blogerdiń memlekettik ustanymǵa qaishy pikir bildirgeni úshin ǵana qýdalanyp jatqan bolýy múmkin ekenin alǵa tartty.
«Biz ádildikti talap etemiz. Ony tek pikiri úshin qylmysker retinde kórsetýge bolmaidy. Ol eshqashan tekserilmegen aqparat taratqan emes», – delingen hatta.
Olardyń sózinshe, Ádilethan buryn politsiia qyzmetkeri bolǵan jáne zańgerlik bilimi bar, sondyqtan jalǵan aqparat taratý jaýapkershiligin jaqsy túsinedi.
Qazirgi tańda is QR Qylmystyq kodeksiniń 274-baby boiynsha qarastyrylýy múmkin. Bul bapta internet arqyly jalǵan aqparat taratqany úshin aiyppuldan bastap úsh jylǵa deiin bas bostandyǵynan aiyrý jazasy kózdelgen.
Týystary bul jaǵdai blogerlerge qysym kórsetý quralyna ainalyp ketýi múmkin dep alańdaidy.
«Ony basqalarǵa sabaq bolsyn dep jazalai ma degen qaýip bar. Tergeý ashyq ári ádil ótsin deimiz», – dedi kúdiktiniń jaqyndary.
Úndeý sońynda olar Memleket basshysynan isti jeke baqylaýǵa alýdy surady.
