Búgin Jetisý oblysynyń ortalyǵynda 55 jeke turǵyn úi paidalanýǵa berildi. Kezekte turǵan áleýmettik osal toptaǵy azamattarǵa jańa baspanalardyń kiltin oblys ákimi Beibit Isabaev tapsyrdy, dep habarlaidy Dalanews.kz.
Qonys ielerin quttyqtaǵan óńir basshysy ár otbasynyń óz baspanasynyń bolýy olardyń ómir súrý sapasyna oń áser etetinin atap ótti.
- Búgin «Jastar-3» turǵyn alabynda jer úilerdiń kiltin tapsyrǵaly otyrmyz. Bul úilerdiń aldynda 5-6 sotyq jeri bar. Oǵan baý-baqsha egip, paidalanatyn bolasyzdar. Elektr jaryǵy, sýy, gazy tartylǵan. Joldardy asfalttaý jumystary aiaqtalýǵa jaqyn. Avtobýs marshrýtyn da júrgizemiz. Úlken mektep, feldsherlik akýsherlik pýnkt, saiabaq salynady. Sóitip bul turǵyn alap jaily kottedj qalashyǵyna ainalady, - degen B. Isabaev azamattarǵa úilerdiń kiltin tapsyrdy.
Jańa qonysqa ie bolǵandardyń biri Leila Alekseeva:
- Men balalar úiinde tárbielendim. 2013 jyldan beri «jetim balalar» sanatynda kezekte turdym. Búgin kópten kútken úiime qol jetkizip otyrmyn. Qazir úsh balam bar, olar da qýanyp jatyr. Oǵan qosa aldyńǵy jáne byltyrǵy jyldary meniń týǵan baýyrlarym da úili boldy. Bizge kórsetken qamqorlyǵy úshin memleketke rizamyz, - dedi ol.
Búgin baspanaly bolǵandardyń taǵy biri kóp balaly ana Ásel Baitumanova da qýanyshyn jasyrmady:
- Ózim shashtaraz bolyp jumys isteimin. Bes balam bar. Balalarymnyń 4-eýi mektepte oqidy. Olar qalanyń ár mektebinde oqyp júr. Kilt berý saltanatynda bolashaqta munda jańa bilim oshaǵy salynatynyn estip, qýanyshymyz eselene tústi - dedi ol.
Sol siiaqty osy kúni qýanyshqa kenelgender arasynda kóp balaly áke Azamat Myrzaǵaliuly da bar:
– Jasym 46-da. Zaiybym ekeýmiz 5 bala tárbielep ósirip otyrmyz, olardyń aldy 20 jasta, kishisi – 10-da. Úi alý kezegine 2017 jyly turǵanbyz, baspanaǵa búgin qol jetkizdik. Jańa úige jaqyn kúnderde kóship kelemiz. Biraz ýaqyt osy úilerdiń qurylys jumysynda istedim. Úilerdiń shatyryn jaýyp, syrtyn qaptadyq. Baspana sapaly salynǵanyna ózim kýá bolǵan edim, endi búgin osy aýdannyń turǵyny atanyp jatyrmyz. Qýanyshymyzda shek joq. Balalarymyzdyń nesibesi dep bilemin. Elimiz aman, jurtymyz tynysh bolsyn! – dedi A. Myrzaǵaliuly.
Atap ótsek, Taldyqorǵan qalasyndaǵy bul «Jastar-3» turǵyn alabynda jobaǵa sáikes 790 jeke turǵyn úi salý josparlanǵan, sonyń 309-ynyń qurylysy aiaqtalǵan. Sonyń ishinde búgingi úilerdi qosqanda 166 úi paidalanýǵa berildi. Qazirgi kezde taǵy 250 úidiń qurylysy júrip jatyr. Jalpy jobany 2027 jyly aiaqtaý josparlanǵan. Sondai-aq áleýmettik infraqurylymdy damytý isi de qatar júrgizilýde. Atalǵan aýdanda 1200 oryndy mektep, feldsherlik-ambýlatoriialyq pýnkt, ýchaskelik politsiia pýkti, sport kesheni salynady, sol siiaqty saiabaq pen alleia abattandyrylady. Atalǵan nysandardyń birqatarynyń jobalyq qujattary daiyndalýda.
Jalpy, ótken jyly qalada 630-dan astam adam jańa qonysqa ie bolsa, jyl sońyna deiin shamamen 1 400 turǵyndy baspanamen qamtý josparlanyp otyr. Qazirgi tańda oblys ortalyǵynda 20 000-nan astam adam turǵyn úi kezeginde tur.
