بۇگىن جەتىسۋ وبلىسىنىڭ ورتالىعىندا 55 جەكە تۇرعىن ءۇي پايدالانۋعا بەرىلدى. كەزەكتە تۇرعان الەۋمەتتىك وسال توپتاعى ازاماتتارعا جاڭا باسپانالاردىڭ كىلتىن وبلىس اكىمى بەيبىت يسابايەۆ تاپسىردى، دەپ حابارلايدى Dalanews.kz.
قونىس يەلەرىن قۇتتىقتاعان ءوڭىر باسشىسى ءار وتباسىنىڭ ءوز باسپاناسىنىڭ بولۋى ولاردىڭ ءومىر ءسۇرۋ ساپاسىنا وڭ اسەر ەتەتىنىن اتاپ ءوتتى.
- بۇگىن «جاستار-3» تۇرعىن الابىندا جەر ۇيلەردىڭ كىلتىن تاپسىرعالى وتىرمىز. بۇل ۇيلەردىڭ الدىندا 5-6 سوتىق جەرى بار. وعان باۋ-باقشا ەگىپ، پايدالاناتىن بولاسىزدار. ەلەكتر جارىعى، سۋى، گازى تارتىلعان. جولداردى اسفالتتاۋ جۇمىستارى اياقتالۋعا جاقىن. اۆتوبۋس مارشرۋتىن دا جۇرگىزەمىز. ۇلكەن مەكتەپ، فەلدشەرلىك اكۋشەرلىك پۋنكت، ساياباق سالىنادى. ءسويتىپ بۇل تۇرعىن الاپ جايلى كوتتەدج قالاشىعىنا اينالادى، - دەگەن ب. يسابايەۆ ازاماتتارعا ۇيلەردىڭ كىلتىن تاپسىردى.
جاڭا قونىسقا يە بولعانداردىڭ ءبىرى لەيلا الەكسەيەۆا:
- مەن بالالار ۇيىندە تاربيەلەندىم. 2013 جىلدان بەرى «جەتىم بالالار» ساناتىندا كەزەكتە تۇردىم. بۇگىن كوپتەن كۇتكەن ۇيىمە قول جەتكىزىپ وتىرمىن. ءقازىر ءۇش بالام بار، ولار دا قۋانىپ جاتىر. وعان قوسا الدىڭعى جانە بىلتىرعى جىلدارى مەنىڭ تۋعان باۋىرلارىم دا ءۇيلى بولدى. بىزگە كورسەتكەن قامقورلىعى ءۇشىن مەملەكەتكە ريزامىز، - دەدى ول.
بۇگىن باسپانالى بولعانداردىڭ تاعى ءبىرى كوپ بالالى انا اسەل بايتۇمانوۆا دا قۋانىشىن جاسىرمادى:
- ءوزىم شاشتاراز بولىپ جۇمىس ىستەيمىن. بەس بالام بار. بالالارىمنىڭ 4-ەۋى مەكتەپتە وقيدى. ولار قالانىڭ ءار مەكتەبىندە وقىپ ءجۇر. كىلت بەرۋ سالتاناتىندا بولاشاقتا مۇندا جاڭا ءبىلىم وشاعى سالىناتىنىن ەستىپ، قۋانىشىمىز ەسەلەنە ءتۇستى - دەدى ول.
سول سياقتى وسى كۇنى قۋانىشقا كەنەلگەندەر اراسىندا كوپ بالالى اكە ازامات مىرزاعالي ۇلى دا بار:
– جاسىم 46-دا. زايىبىم ەكەۋمىز 5 بالا تاربيەلەپ ءوسىرىپ وتىرمىز، ولاردىڭ الدى 20 جاستا، كىشىسى – 10-دا. ءۇي الۋ كەزەگىنە 2017 جىلى تۇرعانبىز، باسپاناعا بۇگىن قول جەتكىزدىك. جاڭا ۇيگە جاقىن كۇندەردە كوشىپ كەلەمىز. ءبىراز ۋاقىت وسى ۇيلەردىڭ قۇرىلىس جۇمىسىندا ىستەدىم. ۇيلەردىڭ شاتىرىن جاۋىپ، سىرتىن قاپتادىق. باسپانا ساپالى سالىنعانىنا ءوزىم كۋا بولعان ەدىم، ەندى بۇگىن وسى اۋداننىڭ تۇرعىنى اتانىپ جاتىرمىز. قۋانىشىمىزدا شەك جوق. بالالارىمىزدىڭ نەسىبەسى دەپ بىلەمىن. ەلىمىز امان، جۇرتىمىز تىنىش بولسىن! – دەدى ا. مىرزاعالي ۇلى.
اتاپ وتسەك، تالدىقورعان قالاسىنداعى بۇل «جاستار-3» تۇرعىن الابىندا جوباعا سايكەس 790 جەكە تۇرعىن ءۇي سالۋ جوسپارلانعان، سونىڭ 309-ىنىڭ قۇرىلىسى اياقتالعان. سونىڭ ىشىندە بۇگىنگى ۇيلەردى قوسقاندا 166 ءۇي پايدالانۋعا بەرىلدى. قازىرگى كەزدە تاعى 250 ءۇيدىڭ قۇرىلىسى ءجۇرىپ جاتىر. جالپى جوبانى 2027 جىلى اياقتاۋ جوسپارلانعان. سونداي-اق الەۋمەتتىك ينفراقۇرىلىمدى دامىتۋ ءىسى دە قاتار جۇرگىزىلۋدە. اتالعان اۋداندا 1200 ورىندى مەكتەپ، فەلدشەرلىك-امبۋلاتوريالىق پۋنكت، ۋچاسكەلىك پوليسيا پۋكتى، سپورت كەشەنى سالىنادى، سول سياقتى ساياباق پەن اللەيا اباتتاندىرىلادى. اتالعان نىسانداردىڭ ءبىرقاتارىنىڭ جوبالىق قۇجاتتارى دايىندالۋدا.
جالپى، وتكەن جىلى قالادا 630-دان استام ادام جاڭا قونىسقا يە بولسا، جىل سوڭىنا دەيىن شامامەن 1 400 تۇرعىندى باسپانامەن قامتۋ جوسپارلانىپ وتىر. قازىرگى تاڭدا وبلىس ورتالىعىندا 20 000-نان استام ادام تۇرعىن ءۇي كەزەگىندە تۇر.
