Otbasy bank Qazaqstan boiynsha turǵyn úi kezegindegi azamattardyń tizimin tekserýdiń aralyq qorytyndylaryn jariialady, dep habarlaidy Dalanews.kz.
Bank málimetinshe, kezek tizimderi Otbasy bankke berilgennen keiin inventarizatsiia bastalǵan. Bul – kezekte turǵan azamattardyń derekterin naqtylap, olardyń mártebesin, otbasy quramyn, sanatyn jáne turǵyn úiiniń bar-joǵyn tekserý rásimi.
Qazirgi tańda 408 565 azamat tekserýden ótken, taǵy 49 011 adamnyń málimeti qaralý ústinde.
Sonymen qatar 74 005 azamattyń kezegi ýaqytsha toqtatylǵan. Bul olardyń esepke qoiylý jaǵdailaryn tolyq anyqtaý úshin jasalǵan. Al 16 537 adam turǵyn úi kezeginen múlde shyǵarylǵan.
Taǵy 75 456 adamǵa turǵyn úi kezegine tirkelýge bas tartylǵany belgili boldy.
Bas tartýdyń negizgi sebepteri – azamattyń nemese onyń otbasy músheleriniń atyna turǵyn úidiń tirkelýi, sondai-aq otbasy músheleriniń biriniń turǵyn úi kezeginde burynnan bolýy.
Qazirgi tańda Qazaqstanda turǵyn úi kezeginde 968 640 adam tur. Onyń shamamen 30%-y nemese 306 632 adam basym quqyqqa ie sanatqa jatady. Bul – turǵyn úi máselesin óz betinshe sheshýi qiyn azamattar. Memlekettik qoldaý sharalary negizinen osy toptarǵa baǵyttalǵan.
Endi turǵyn úi kezegine sońǵy bes jylda baspanasy bolmaǵan barlyq kámeletke tolǵan qazaqstandyqtar, sondai-aq jalǵyz baspanasy apatty dep tanylǵan azamattar tirkele alady.
