Jetisý oblysynda qoqystan eltańba taýyp alǵan blogerge aıyppul salyndy. Atalǵan oqıǵa qoǵamda qyzý talqylandy. Alaıda polısıa bul jaǵdaıdyń mán-jaıy kópshilikke durys jetkizilmegenin málimdedi, dep habarlaıdy Dalanews.kz.

Oblystyq polısıa departamentiniń túsindirýinshe, azamat jaýapkershilikke Eltańbany tapqany úshin emes, keıin oǵan qatysty jasaǵan áreketteri úshin tartylǵan.

Turǵyn Eltańba maketin 2022 jyly Jansúgirov aýylynan taýyp alǵan. Ol bul týraly tıisti oryndarǵa habarlap, nysandy ákimdikke ótkizýdi josparlaǵanymen, belgisiz sebeptermen ózinde saqtap qalǵan. Biraz ýaqyt ótken soń oǵan 200 myń teńgeden astam aıyppul salynǵan.

Polısıanyń málimetinshe, quqyqbuzýshylyq Eltańbany tapqan sátte emes, odan keıingi áreketter barysynda oryn alǵan. Atap aıtqanda, azamat memlekettik nyshandy ádepsiz túrde sýretke túsirip, onyń burmalanǵan beınesin áleýmettik jelide jarıalaǵan.

“Bul áreketter memlekettik rámizderge qurmetsizdik tanytý retinde baǵalandy jáne qoldanystaǵy zańnamaǵa sáıkes ákimshilik jaýapkershilikke ákeledi”, – dep túsindirdi vedomstvo ókilderi.

Osyǵan baılanysty polısıa azamattardy tek resmı derekkózderge súıenýge jáne jalǵan nemese burmalanǵan aqparat taratpaýǵa shaqyrdy.