Jetisý oblysynda qoqystan eltańba taýyp alǵan blogerge aiyppul salyndy. Atalǵan oqiǵa qoǵamda qyzý talqylandy. Alaida politsiia bul jaǵdaidyń mán-jaiy kópshilikke durys jetkizilmegenin málimdedi, dep habarlaidy Dalanews.kz.
Oblystyq politsiia departamentiniń túsindirýinshe, azamat jaýapkershilikke Eltańbany tapqany úshin emes, keiin oǵan qatysty jasaǵan áreketteri úshin tartylǵan.
Turǵyn Eltańba maketin 2022 jyly Jansúgirov aýylynan taýyp alǵan. Ol bul týraly tiisti oryndarǵa habarlap, nysandy ákimdikke ótkizýdi josparlaǵanymen, belgisiz sebeptermen ózinde saqtap qalǵan. Biraz ýaqyt ótken soń oǵan 200 myń teńgeden astam aiyppul salynǵan.
Politsiianyń málimetinshe, quqyqbuzýshylyq Eltańbany tapqan sátte emes, odan keiingi áreketter barysynda oryn alǵan. Atap aitqanda, azamat memlekettik nyshandy ádepsiz túrde sýretke túsirip, onyń burmalanǵan beinesin áleýmettik jelide jariialaǵan.
“Bul áreketter memlekettik rámizderge qurmetsizdik tanytý retinde baǵalandy jáne qoldanystaǵy zańnamaǵa sáikes ákimshilik jaýapkershilikke ákeledi”, – dep túsindirdi vedomstvo ókilderi.
Osyǵan bailanysty politsiia azamattardy tek resmi derekkózderge súienýge jáne jalǵan nemese burmalanǵan aqparat taratpaýǵa shaqyrdy.
