Memleket basshysy Qasym-Jomart Toqaev Qazaqstan halqynyń birligi merekesine orai qazaqstandyqtarǵa quttyqtaý joldady, dep habarlaidy Dalanews.kz.
Prezident bul kúndi qoǵamdaǵy tatýlyq pen ózara qurmetti dáripteitin mańyzdy meiram retinde atap ótti.
"Bul – qoǵamymyzdyń myzǵymas qundylyqtaryn pash etetin qasterli meiram. Birlik kúni halqymyzdyń tilektestigi men aýyzbirshiligi, ózara syilastyǵy men qurmeti, otanshyldyǵy men perzenttik súiispenshiligi keńinen dáripteledi.
Kezinde taǵdyrdyń jazýymen elimizde turaqtaǵan túrli etnos ókilderi Qazaqstan atty kieli Shańyraqtyń astynda bir úidiń balasyndai tatý-tátti ómir súrip jatyr. Bul – bárimizge ortaq igilik.
Dana halqymyz "Tatýlyq – taýsylmas baqyt" dep beker aitpaǵan. Biz – beibit zamannyń qadirin biletin, ainalasyna janashyrlyqpen qaraityn, árdaiym kómek qolyn sozýǵa daiyn turatyn elmiz. Bul – birtutas ultymyzdyń bolmysyna tán qasiet. Biz osy biregei dástúrdi kózdiń qarashyǵyndai saqtap qalýymyz kerek”, – dedi Memleket basshysy.
Toqaev birlik, yntymaq jáne etnosaralyq tatýlyq qaǵidattary Konstitýtsiianyń preambýlasynda bekitilgenin atap ótti.
“Bizdiń kózqarasymyz ártúrli bolǵanymen, tilegimiz – bir. “Birligimiz – áralýandyqta” formýlasy memlekettik saiasat pen azamattarymyzdyń kúndelikti ómiriniń ózegine ainaldy.
Sondyqtan biz birlik, yntymaq, etnosaralyq jáne konfessiiaaralyq tatýlyq qaǵidattaryn jańa Konstitýtsiianyń preambýlasynda naqty kórsettik.
Bul – Qazaqstan halqynyń sanaly túrde jasaǵan tańdaýy. Sebebi azamattarymyz barshaǵa birdei quqyqtar men múmkindikter beretin elde, ádil, turaqty jáne baqýatty qoǵamda turýdy qalaidy”, - deidi ol.
Sondai-aq Prezident “Zań men tártip” tujyrymdamasy eldegi jańǵyrý úderisiniń negizi bolatynyn jetkizdi.
“Bizdiń tarihymyz, búginimiz jáne bolashaǵymyz – bir. Bul –Qazaqstan halqynyń sarqylmas kúsh-qýaty men otanshyldyq rýhynyń aiqyn kórinisi. Biz bárimiz bir el bolyp jumylyp, ósip-órkendeý jolynda biik belesterdi baǵyndyra beretinimizge kámil senemin.
Qymbatty otandastar, barshańyzǵa zor densaýlyq, amandyq jáne baq-bereke tileimin”, - dep túiindedi ol.
