AQSh prezidenti Donald Tramptyń uldary Erik pen kishi Donald Tramp Qazaqstanda volfram óndiretin kompaniianyń úleskeri atanǵan. Bul týraly Financial Times jazdy, dep habarlaidy Dalanews.kz.
Basylym málimetinshe, atalǵan kompaniia AQSh úkimetinen byltyr 1,6 mlrd dollarǵa deiin qarjylai qoldaý alǵan. Qarajat Qazaqstandaǵy iri volfram ken ornyn igerýge baǵyttalǵan. Endi osy jobaǵa Tramptyń uldary janama túrde úles qosady.
Sarapshylar muny AQSh úshin strategiialyq qadam dep baǵalap otyr. Sebebi volfram qorǵanys ónerkásibinde keńinen qoldanylatyn mańyzdy metall. Vashington osy arqyly Qytaiǵa táýeldilikti azaitýdy kózdeidi.
Buǵan deiin tamyz aiynda Tramptyń uldary Skyline Builders kompaniiasyna investitsiia salǵan. Olar úlesti Dominari Securities arqyly alǵan. Investitsiia kólemi jariialanǵan joq.
Sondai-aq derekkózderdiń aitýynsha, 22 qyrkúiekte Qazaqstan prezidenti Qasym-Jomart Toqaev Donald Trampqa volfram óndirý jobasyn amerikalyq Cove Kaz Capital kompaniiasyna berý jospary bar ekenin aitqan. Bul kompaniia Qytai men Resei kásiporyndarymen básekege túsken.
Keiin qazan aiynda Tramptyń uldary Skyline kompaniiasyndaǵy úlesin ulǵaityp, shamamen 24 mln dollar kólemindegi aktsiia satyp alǵan. Al 31 qazanda Skyline Aziiadaǵy iri mineral qorlaryna ie Kaz Resources kompaniiasynyń 20 paiyz úlesin 20 mln dollarǵa satyp alýǵa kelisken.
Bul kompaniia Cove Capital tobyna tiesili jáne sol top Cove Kaz Capital kompaniiasyn da baqylaidy. 6 qarashada Cove Capital Qazaqstannyń ulttyq taý ken kompaniiasymen álemdegi eń iri ári áli tolyq igerilmegen volfram ken ornyn igerý týraly kelisim jasaǵanyn jariialady.
Osylaisha Cove Kaz Capital men Kaz Resources Skyline kompaniiasymen birigýge kelisti. Jańa kompaniia Nasdaq birjasyna Kaz Resources ataýymen shyǵýdy josparlap otyr. Aita keteiik, resmi habarlamada Tramptyń uldarynyń aty atalmaǵan.
