QMG jumys toby «Ózenmunaigaz» ben Jańaózenniń merdiger uiymdarynda birqatar zań buzýshylyqty anyqtady
Osy ýaqyt aralyǵynda ondaǵan buzýshylyq anyqtaldy, olarǵa aldaǵy ýaqytta quqyqtyq baǵa beriledi.
Jumys tobynyń jetekshisi, «QazMunaiGaz» UK AQ Basqarma Tóraǵasynyń orynbasary Dáýletjan Hasanov anyqtalǵan keibir buzýshylyqtar týraly baiandady.
D.Hasanovtyń aitýynsha, «Ózenmunaigaz» kompaniiasynda jumys oryndaryna kelmegen qyzmetkerlerdi jumysqa ornalastyrǵan faktiler anyqtalǵan. Osyndai jaǵdailardyń biri, aqtaýlyq belgili aitysker aqyn aldymen shtatta teolog, keiinnen qoǵammen bailanys jónindegi maman qyzmetin atqarǵan.
«Kompaniia shtatyna kezekten tys nemese biliktilik talaptaryna sáikes kelmeitin jáne jóndeýmen ainalysatyn bólimshelerdiń mamandyqtary boiynsha jetkilikti jumys tájiribesi joq adamdardy jumysqa qabyldaý faktileri bar», — dep qosty ol.
Jumys tobynyń jetekshisi atap ótkendei, birqatar júk kólikteriniń GPS derekterin ýaqyt kestelerimen salystyrǵan kezde, derekterdiń sáikes kelmegeni anyqtalǵan. «Iaǵni, avtomobilder naqty júrip ótken ýaqyt aralyǵyn tabelderde asyra kórsetken. Tiisinshe, atqarylǵan jumys úshin tólem de asyra baǵalandy», — dep atap ótti D.Hasanov.
Sondai-aq, jumys toby munai óndiretin jabdyqty jalǵa alý qyzmeti birneshe ese joǵary baǵaǵa kórsetilgen jaǵdaidy anyqtady. Osylaisha, servis kórsetetin kompaniialardyń biri «Ózenmunaigazǵa» ámbebap elektr ortalyqtan tepkish sorǵyny táýligine uńǵymaǵa 96 myń teńge baǵamen jalǵa bergen. Óńirdegi basqa munai óndirýshi kompaniianyń dál osyndai sorǵyny jalǵa berý baǵasy budan 2 ese arzan, atap aitqanda táýligine uńǵymaǵa 39,7 myń teńge.
QMG Basqarma Tóraǵasynyń orynbasary satyp alý salasynan taǵy bir mysal keltirdi. Atap aitqanda, ÓMG uńǵymalardy jóndeýge arnalǵan 14 dana kótergish agregat satyp aldy. Mámileniń jalpy somasy 1,5 mlrd teńgeden asqan. Jetkizý merzimi — 2022 jyldyń 31 jeltoqsany. Tekserý barysynda kórsetilgen merzimde 14 agregattyń bireýi ǵana jetkizilgeni anyqtaldy. Esep berý qujattamasynda ol jańa dep kórsetilgen. Alaida, tekseris nátijesinde onyń komponentteri áldeqashan eskirgeni, kóptegen bólshekteriniń joq ekeni, qýat konstrýktsiialary paidalaný úshin qaýipti ekeni anyqtaldy. Muny jasyrý úshin tot basqan korpýsy men shassidiń metall konstrýktsiialary qara túske boialǵan.
Jumys toby óndiristik jáne ekologiialyq qaýipsizdik normalaryn buzǵan jaǵdailardy joiý úshin ÓMG men munai servis kompaniialaryna usynystar men tapsyrmalar berdi. Mysaly, birqatar nysanda ǵimarattar men qurylystar boiynsha jobalaý qujattary joq, jeldetý júiesi qaýipsizdik tehnikasynyń talaptaryna sáikes kelmeidi. Uńǵymalardy jóndeý jumystary kezinde ekologiialyq normalar saqtalmaidy, onyń ishinde uńǵymalardy jerasty jáne kúrdeli jóndeý kezinde qorǵanysh plenkalary joq, úiindiler qoima retinde paidalanylady, lastanǵan topyraq ýaqtyly alynbaidy.
D.Hasanov Jańaózen kásiporyndary qyzmetkerleriniń shaǵymdaryn tekserý máselesine jeke toqtaldy. Belgili bolǵandai, ÓMG-niń keibir merdiger uiymdarynda zeinetaqy aýdarymdaryn 2-3 aiǵa keshiktirgen jaǵdailar bar, kólik qyzmetin usynatyn merdiger uiymdardyń qyzmetkerleri arnaiy kiimmen jáne tamaqpen qamtamasyz etilmeidi, ústeme jumys ýaqyty asyp ketken jaǵdailar tirkelgen. Árbir atalǵan fakti boiynsha tiisti sharalar qabyldanatyn bolady.
«Jalpy, jumys jalǵasady. Bul anyqtalǵan jergilikti buzýshylyqtardyń keibir mysaly ǵana. Jańa faktiler týraly biz jurtshylyqty habardar etip otyramyz. Anyqtalǵan buzýshylyqtardyń árbir tarmaǵy boiynsha quqyqtyq baǵa beriletin bolady. Barlyq jaýaptylar quqyq buzýshylyqtardyń aýyrlyǵyna bailanysty jazalanady. Tiisti qujattardy quqyq qorǵaý organdaryna tapsyramyz», — dep túiindedi D.Hasanov.
