Qazaqstan halqynyń qaiyrymdylyqqa degen jomarttyq deńgeii boiynsha halyqaralyq Charities Aid Foundation (CAF) uiymy jasaǵan jahandyq reitingte el 30-oryndy ielendi, dep habarlaidy Dalanews.kz Ranking.kz-ke silteme jasap.
Reiting derekterine sáikes, qazaqstandyqtar tabysynyń 1,2 paiyzyn qaiyrymdylyqqa jumsaýǵa daiyn.
Sonymen birge, qazaqstandyqtardyń jomarttyq deńgeii damyǵan memleketter – AQSh, Ulybritaniia, Germaniia jáne Niderland halqynyń kórsetkishterinen joǵary boldy.
«Tabystyń úlesine shaqqandaǵy qaiyrymdylyq jarnalarynyń kólemi tabysy tómen elderde áldeqaida joǵary. Sondyqtan reitingtiń alǵashqy bestigine birden tórt afrikalyq memleket kirdi – Nigeriia (tabystyń 2,8 paiyzy), Mysyr (2,5 paiyzy), Gana (2,2 paiyzy) jáne Ýganda (2 paiyzy). Sondai-aq eń jomart turǵyndary bar elderdiń qataryna Qytai da endi, onda azamattar tabysynyń 2,2 paiyzyn qaiyrymdylyqqa beredi», – delingen habarlamada.
Jalpy, CAF reitinginde 101 eldiń derekteri qamtylǵan.
Sonymen qatar Numbeo portalynyń málimetteri de joǵary jalaqysy bar memleketter jomarttyq deńgeii boiynsha tómengi qatarlarda ornalasatynyn rastaidy.
«Germaniia 0,4 paiyzdyq kórsetkishpen sońǵy oryndardyń birin ielendi. Al álemde ortasha nominaldy jalaqysy eń joǵary Shveitsariia jomarttyq boiynsha tek 76-orynda: bul el azamattary tabysynyń nebári 0,7 paiyzyn ǵana qaiyrymdylyqqa jumsaidy», – dep atap ótilgen aqparatta.
Mundai úrdis qaiyrymdylyq salasynda birneshe jyldan beri baiqalyp keledi.
«Afrikada aqsha beretin nemese erikti retinde qatysatyn adamdardyń úlesi – 72 paiyz, Eýropada – 59 paiyz, Soltústik Amerikada – 56 paiyz. Al Aziiada bul kórsetkish damyǵan eýropalyq jáne amerikalyq elderden joǵary – 69 paiyz. Álem boiynsha qaiyrymdylyqqa ýaqytyn nemese qarajatyn jumsaityn adamdardyń jalpy úlesi 64 paiyzdy quraidy», – delingen habarlamada.
CAF derekterine súiensek, donorlardyń úsh negizgi túri bar: shamamen 38 paiyzy tikelei muqtaj jandarǵa kómek beredi, 36 paiyzy – qaiyrymdylyq qorlary arqyly, al 25 paiyzy – dini uiymdarǵa qarjy bóledi.
Aziia elderinde donorlardyń basym bóligi (44 paiyz) qaiyrymdylyq uiymdary men qorlarǵa qarajat aýdarýdy jón kóredi. Muqtajdarǵa tikelei kómek berýdi nemese eriktilik qyzmetin 42 paiyz donor tańdaidy.
Aziiadaǵy qaiyrymdylyqtyń negizgi baǵyttary – az qamtylǵandar, gýmanitarlyq kómek, balalar, qarttar jáne dini uiymdar.
Eýropada birinshi orynda – gýmanitarlyq kómek pen balalar jáne jastar uiymdaryn qoldaý, Soltústik Amerikada – úisizder, qarttar jáne jastar, al Afrikada – dini mekemeler men balalarǵa kómek.
CAF sarapshylarynyń aitýynsha, álemdik qaiyrymdylyq sektory sońǵy jyldary qarjylandyrý tapshylyǵy, qaiyrymdylyq jarnalary úshin báseke jáne shyǵyndardyń ósýimen betpe-bet kelip otyr.
«Zertteý aiasyndaǵy saraptamalyq suhbattar sońǵy 12 aida qaiyrymdylyq qorlaryna kómek suraǵandardyń sany artqanyn kórsetti. Bul tek kedei elderge ǵana emes, damýshy memleketterge de qatysty», – delingen aqparatta.
Qazaqstanda da qaiyrymdylyq salasynda birqatar ózekti máseleler bar.
