Qazaqstan Respýblikasy Densaýlyq saqtaý birinshi vitse- ministri Timýr Sultanǵaziev Májilis kýlýarynda búgingi tańda joǵary synyp oqýshylaryn akýsher- ginekolog mamandarynyń keńesimen qamtý máselesi qarastyrylyp jatqanyn málimdedi, dep habarlaidy Dalanews.kz.
Buǵan deiin Aqtóbe oblysynda mektep oqýshysynyń bosanýynan keiin qylmystyq is qozǵalǵany habarlanǵan edi. Oqýshy qyz úsh ret meditsinalyq tekserýden ótkenimen, eshbirinde júktilik anyqtalmaǵan.
Vitse- ministrdiń aitýynsha, qyz bala naqty kásibi tekserýden ótpegen.
- Biylǵy jyldyń naýryz aiynyń basynda skriningtik tekserý bolǵan. Bul – júktiliktiń óte erte kezeńi, sol sebepti ony baiqaý múmkin bolmaǵan. Onyń ústine, bizdiń skriningterde akýsher- ginekolog mamany qarastyrylmaǵan, tek oftalmolog pen lor ǵana bar. Bul jaǵdaida ata- analar da, jaqyndary da, muǵalimder de eshteńe bilmegen. Sondyqtan eshqandai tekseris te, shaǵym da bolmaǵan, - dep túsindirdi Sultanǵaziev.
Endi Densaýlyq saqtaý ministrligi joǵary synyp oqýshylaryna ginekolog qabyldaýyn engizýdi josparlap otyr.
- Qazir bul máseleni qarastyryp jatyrmyz. Biraq túsiný kerek, qyz bala- 14 jasta. Biz ginekolog mamandarynyń jumysyn qarastyrýdamyz. Múmkin, joǵary synyptarda akýsher- ginekologtardyń qabyldaýyn engizetin shyǵarmyz. Bul naqty bolǵan jaǵdaimen tikelei bailanysty emes. Jalpy alǵanda, jasóspirimderdiń akýsher- ginekologqa baryp, keńes alýynyń qajettiligi týraly másele bizde burynnan qozǵalyp keledi. Qazirgi ýaqytta meditsinalyq kómekti uiymdastyrý standarty aiasynda osy máseleni jan- jaqty zerttep, taldap jatyrmyz,- dedi vitse- ministr Timýr Sultanǵaziev.
