Qarjy ministrliginiń tsifrlyq monitoring júiesi memlekettik sektordaǵy zańsyz tólemder men kúmándi shemalardy anyqtaýǵa kómektesti. Bul týraly úkimet otyrysynda vedomstvo basshysy Mádi Tákiev málimdedi, dep habarlaidy Dalanews.kz.
Tengrinews.kz málimetinshe, birqatar aýdandyq bilim bólimderinde qyzmetkerlerge ai saiyn 30-65 mln teńge kóleminde jalaqy jáne 10 mln teńgeden asatyn syiaqy eseptelgen derekter tirkelgen. Mundai buzýshylyqtar jasandy intellekt (JI) arqyly anyqtalǵan.
Mádi Tákievtiń aitýynsha, byltyr JI kómegimen jalpy somasy 307 mlrd teńge kólemindegi táýekeli joǵary tólemder tabylǵan, al biylǵy jyldyń basynan beri taǵy 132 mlrd teńge somasynda kúmándi operatsiialar áshkerelengen.
Ministrdiń sózinshe, tsifrlyq taldaý endi tek bilim berý salasymen shektelmei, densaýlyq saqtaý, mádeniet, týrizm jáne sport salalaryn da qamtidy.
"Keibir uiymdar qarjy institýty bolmaǵanyna qaramastan, ózderine bólingen qarajatty nesie berýge jáne depozitke ornalastyrýǵa paidalanyp, paiyz túrinde tabys tapqan", – dedi ol.
Mysaly, 1 mlrd teńge kólemindegi biýdjet nesiesi depozitke salynyp, 80 mln teńge paida ákelgen. Sonymen qatar, 808 mln teńge somasyna birdei mal basyna birneshe ret sýbsidiia alǵan derekter de tirkelgen.
Mádi Tákiev tsifrlyq baqylaýdy kúsheitý jáne JI-aýditti damytý memlekettik qarajattyń ashyq ári tiimdi jumsalýyn qamtamasyz etýdegi basty basymdyq ekenin atap ótti.
Biylǵy úsh toqsannyń qorytyndysy boiynsha Qazaqstannyń memlekettik biýdjet kirisi 23,4%-ǵa ósken. Bul shamamen 21,5 trln teńge nemese 40 mlrd dollar. Ministrdiń aitýynsha, ósimniń negizgi bóligi salyqtyq túsimder, iaǵni 15 trln teńgeden astam qarajat.
"Bul nátijege jasandy intellekttiń kómegimen qol jetkizdik", – dedi Tákiev.
