Almaty ákiminiń orynbasary Beibit Shahanov jumys sapary aiasynda qalanyń Túrksib aýdanyndaǵy áleýmettik nysandardyń qurylysy men jańarý barysyn tekserdi, dep habarlaidy Dalanews.kz.
Jas Qanat shaǵynaýdanynda kúnine 1350 bala keletin oqýshylardyń innovatsiialyq shyǵarmashylyq ortalyǵynyń qurylysy bastaldy. 14 myń sharshy metr alańda sporttyq-saýyqtyrý basseini, úiirme jumystaryna arnalǵan 42 kabinet, zerthanalar, planetarii jáne jylyjai ornalasady.
«Bul joba eń joǵary standarttarǵa sáikes ári ǵylymi-tehnikalyq, kórkemdik-estetikalyq jáne sporttyq-túzetý baǵyttaryn biriktiretin jáne balalardy jan-jaqty damytatyn kópsalaly alańǵa ainalady. Biz qurylystyń barlyq kezeńin jiti qadaǵalaimyz. Barlyq jumys kelesi jyldyń kúz aiynda aiaqtalýǵa tiis», - dedi Beibit Shahanov.
Budan soń qala ákiminiń orynbasary Altai shaǵynaýdanynda salynyp jatqan aýysymynda 500 adam qabyldaityn emhana qurylysynda boldy. Burynǵy eski nysan buzylyp, qurylys jumystaryna daiyndyqtar júrgizilip jatyr. Qurylystyń aiaqtalý merzimi - 2026 jyly qyrkúiek aiy.
Jańa meditsinalyq mekeme ýltradybystyq apparatty, tsifrlyq fliýorografty jáne mammografty, sondai-aq rentgen, MRT jáne KT júielerin qosa alǵanda, zamanaýi qurylǵylarmen jabdyqtalady. Bul alǵashqy meditsinalyq kómek kórsetýdiń biryńǵai standartyna sáikes diagnostikalyq rásimderdiń tiimdiligin jáne qyzmetterdiń jalpy sapasyn arttyrýǵa múmkindik beredi.
Bul kúni Beibit Shahanov 850 oqýshyǵa arnalǵan №50 mektep ǵimaratyn seismikalyq kúsheitý jáne kúrdeli jóndeý jumystarynyń barysyn da tekserdi. Munda qurylys-montaj jumystary aqpan aiynda bastalyp, osy aida bitýi kerek bolatyn. Qazirgi kezde nysan ishin árleý jumystary júrgizilip, sport alańdary jasalyp, aýmaq kórkeitilip jatyr.
Sonymen qatar, Almaty ákiminiń orynbasary Saǵadat Nurmaǵambetov atyndaǵy Qurlyq áskerleri Áskeri institýtynyń ǵimarattaryn qaita jańartý jumystarynyń qarqynymen tanysty. Munda qalalyq biýdjet qarjysy esebinen injenerlik jelileri jańartylyp, birneshe blok pen ashanaǵa jóndeý jumystary júrgizilip jatyr.
Tekserý sońynda Beibit Shahanov Qurylys basqarmasyna atalǵan nysandardaǵy jumystardyń sapasy men oryndalý merzimine baqylaýdy kúsheitýdi tapsyrdy.
