الماتى اكىمىنىڭ ورىنباسارى بەيبىت شاحانوۆ جۇمىس ساپارى اياسىندا قالانىڭ تۇركسىب اۋدانىنداعى الەۋمەتتىك نىسانداردىڭ قۇرىلىسى مەن جاڭارۋ بارىسىن تەكسەردى، دەپ حابارلايدى Dalanews.kz.
جاس قانات شاعىناۋدانىندا كۇنىنە 1350 بالا كەلەتىن وقۋشىلاردىڭ يننوۆاسيالىق شىعارماشىلىق ورتالىعىنىڭ قۇرىلىسى باستالدى. 14 مىڭ شارشى مەتر الاڭدا سپورتتىق-ساۋىقتىرۋ باسسەينى، ۇيىرمە جۇمىستارىنا ارنالعان 42 كابينەت، زەرتحانالار، پلانەتاريي جانە جىلىجاي ورنالاسادى.
«بۇل جوبا ەڭ جوعارى ستاندارتتارعا سايكەس ءارى عىلىمي-تەحنيكالىق، كوركەمدىك-ەستەتيكالىق جانە سپورتتىق-تۇزەتۋ باعىتتارىن بىرىكتىرەتىن جانە بالالاردى جان-جاقتى دامىتاتىن كوپسالالى الاڭعا اينالادى. ءبىز قۇرىلىستىڭ بارلىق كەزەڭىن ءجىتى قاداعالايمىز. بارلىق جۇمىس كەلەسى جىلدىڭ كۇز ايىندا اياقتالۋعا ءتيىس»، - دەدى بەيبىت شاحانوۆ.
بۇدان سوڭ قالا اكىمىنىڭ ورىنباسارى التاي شاعىناۋدانىندا سالىنىپ جاتقان اۋىسىمىندا 500 ادام قابىلدايتىن ەمحانا قۇرىلىسىندا بولدى. بۇرىنعى ەسكى نىسان بۇزىلىپ، قۇرىلىس جۇمىستارىنا دايىندىقتار جۇرگىزىلىپ جاتىر. قۇرىلىستىڭ اياقتالۋ مەرزىمى - 2026 جىلى قىركۇيەك ايى.
جاڭا مەديسينالىق مەكەمە ۋلترادىبىستىق اپپاراتتى، سيفرلىق فليۋوروگرافتى جانە مامموگرافتى، سونداي-اق رەنتگەن، مرت جانە كت جۇيەلەرىن قوسا العاندا، زاماناۋي قۇرىلعىلارمەن جابدىقتالادى. بۇل العاشقى مەديسينالىق كومەك كورسەتۋدىڭ ءبىرىڭعاي ستاندارتىنا سايكەس دياگنوستيكالىق راسىمدەردىڭ تيىمدىلىگىن جانە قىزمەتتەردىڭ جالپى ساپاسىن ارتتىرۋعا مۇمكىندىك بەرەدى.
بۇل كۇنى بەيبىت شاحانوۆ 850 وقۋشىعا ارنالعان №50 مەكتەپ عيماراتىن سەيسميكالىق كۇشەيتۋ جانە كۇردەلى جوندەۋ جۇمىستارىنىڭ بارىسىن دا تەكسەردى. مۇندا قۇرىلىس-مونتاج جۇمىستارى اقپان ايىندا باستالىپ، وسى ايدا ءبىتۋى كەرەك بولاتىن. قازىرگى كەزدە نىسان ءىشىن ارلەۋ جۇمىستارى جۇرگىزىلىپ، سپورت الاڭدارى جاسالىپ، اۋماق كوركەيتىلىپ جاتىر.
سونىمەن قاتار، الماتى اكىمىنىڭ ورىنباسارى ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ عيماراتتارىن قايتا جاڭارتۋ جۇمىستارىنىڭ قارقىنىمەن تانىستى. مۇندا قالالىق بيۋدجەت قارجىسى ەسەبىنەن ينجەنەرلىك جەلىلەرى جاڭارتىلىپ، بىرنەشە بلوك پەن اسحاناعا جوندەۋ جۇمىستارى جۇرگىزىلىپ جاتىر.
تەكسەرۋ سوڭىندا بەيبىت شاحانوۆ قۇرىلىس باسقارماسىنا اتالعان نىساندارداعى جۇمىستاردىڭ ساپاسى مەن ورىندالۋ مەرزىمىنە باقىلاۋدى كۇشەيتۋدى تاپسىردى.
