Óńirde bul máselege milliardtar jumsalmaqshy. Bizge jetken málimetter boiynsha, oblystyq máslihat depýtattary Ile aýdany Baiserke aýylynda ornalasqan «A.Asanov atyndaǵy atqyshtar klýby» JShS-ine 11,2 mlrd teńge bólý týraly usynysty maquldaǵan. Bul memleket pen jekemenshik seriktestik negizinde júzege asatyn joba deidi derekkóz.
"2024 jyldyń qarasha aiynda Almaty oblysynyń ákimdigi máslihat depýtattaryna atalǵan klýbqa 10 jyldyq merzimge 11 mlrd 265 mln teńge bólýdi usyndy. Máslihat biraýyzdan maquldamasa da, kópshilik daýyspen sheshim bekitildi", - deidi, derekkóz.
Atqyshtar klýby 2002 jyly ashylǵan. Sol ýaqyttan beri kommertsiialyq nysan retinde jumys istep, salyq tólep kelgen. Tiisti kommýnikatsiia jelileri túgeldei tartylǵan. Tolyq jumys istep tur. Al sońǵy 5 jylda memleketke tólegen salyq mólsheri ashyq derekterde bar. Tek 2025 jyly salyq kólemi kúrt óskeni baiqalady. Sebebi oblystyq ákimdik klýbqa 2024 jyly 1,2 mlrd teńge, 2025 jyly 761 mln teńge bólgen.
Ol qarjyǵa atqyshtar klýby jańa ǵimarat salý, infraqurylymdy damytýǵa jumsaýy tiis edi. Alaida burynǵy ǵimaratqa tek jóndeý jumystary júrgizilgen. Únemi biýdjet tapshy, qarjy jetispeidi dep júrgenimizde atqyshtar klýbyna milliard shyǵyndaý qajet pe?
