Saǵyndyq Baisalovtyń týǵanyna – 95 jyl
Aýqymdy sharaǵa QR Parlamenti, QR Konstitýtsiialyq soty, QR Joǵarǵy soty, QR Ekologiia jáne tabiǵi resýrstar ministrligi, QR Aýyl sharýashylyǵy ministrligi, Eńbek jáne halyqty áleýmettik qorǵaý ministrligi, Almaty qalasy mamandandyrylǵan tabiǵat qorǵaý prokýratýrasy ókilderi, belgili qazaqstandyq zańgerler jáne Resei, Estoniia, Polsha, Ózbekstan ǵalymdary, oqytýshy-professorlar men bilim alýshy jastar qatysty.
Jiynnyń ashylýynda Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaevtyń quttyqtaý sózi oqyldy.
«Saǵyndyq Baisalovtyń shirek ǵasyr buryn elimizdiń ekologiialyq ahýaly, sý máselesin kótergen problemalary áli de ózektiligin joiǵan joq. Memleket basshysy Qasym-Jomart Toqaev búginde «Jasyl ekonomika» ideiasyn ustanyp, ekonomikany kógaldandyrý men qorshaǵan ortany qorǵaý isine erekshe kóńil bólip otyr. Osy máselelerde jańa zań jobalaryn jasaýshylar Saǵyndyq Baisaluly negizin qalaǵan zań normalaryna súienetini anyq», – delindi hatta.
Sharany ashqan QazUÝ-dyń Basqarma múshesi – akademiialyq máseleler jónindegi prorektory Lázzat Erkinbaeva ǵalym murasyn zerdeleýdiń mańyzyna mán berdi. Qairatker tulǵanyń ýniversitet damýyna, kásibi zańger mamandardy tárbieleýge úlken eńbek sińirgenin aita kele, bilikti zańger retinde Qazaqstanda jer-sý kodeksin, tabiǵatty qorǵaýǵa bailanysty zań jobalaryn daiyndaýǵa qatysqanyn atap ótti.
Belgili zańger, professor, QazUÝ rektorynyń keńesshisi Erkin Dúisenov óz sózinde Saǵyndyq Baisalovtyń adamgershilik qasieti men azamattyq kelbetin eske aldy. Ór minezdi, eńbekqor, adal da ádil jannyń izgi qasietteri keiingi urpaq úshin ónege ekenin jetkizdi.
«Ýniversitet qabyrǵasynda júrip, jastardyń qamqorshysy bolyp, bilimdi shákirtter tárbieledi. 70-ten astam ǵylymi eńbek jazyp, ózindik ǵylymi mektep qalyptastyrdy», – dedi Erkin Ermanuly.
Sondai-aq konferentsiia barysynda Kaspii ýniversitetiniń jeke quqyq ǵylymi-zertteý institýtynyń direktory, akademik Maidan Súleimenov, D.A.Qonaev atyndaǵy Eýraziialyq zań akademiiasynyń rektory, professor Ómiráli Jalairi jáne ózge de áriptesteri men shákirtteri sóz aldy. Olar Saǵyndyq Baisalovtyń ekologiia jáne jer, sý qatynastary salasyndaǵy ǵylymi-teoriialyq ideialary men tujyrymdamalaryn taldap, qazirgi tańdaǵy ekologiialyq qaýipsizdik jaiyn qozǵady. Atap aitqanda, «Jasyl Qazaqstan» ulttyq jobasy sheńberinde halyq úshin qolaily ómir súrý ortasyn qurý jáne ekologiialyq jaǵdaidy jaqsartý, sýdy tiimdi jáne uqypty paidalaný, sirek kezdesetin jáne joiylyp bara jatqan janýarlar túrleri men ihtiofaýnanyń sanyn ulǵaitý, jasyl ekpeler alańyn úlkeitý, tabiǵat pen janýarlar dúniesine uqypty qaraýǵa daǵdylandyrý arqyly biologiialyq ártúrlilikti saqtaý siiaqty ózekti ekologiialyq máseleler keńinen qarastyryldy.
Sonymen qatar «Baisalov oqýlary» aiasynda stýdentterge demeýlik shákirtaqylar tabystaldy. Konferentsiia jumysy ary qarai plenarlyq otyrysqa ulasty.
Ál-Farabi atyndaǵy QazUÝ-dyń
Baspasóz qyzmeti
