Almatynyń Túrksib aýdandyq soty 2019 jyly bolǵan Bek Air ushaǵynyń apatyna qatysty úkim shyǵardy, dep habarlaidy Dalanews.kz.
Bek Air kompaniiasyna tiesili Fokker 100 ushaǵy 2019 jyldyń 27 jeltoqsanynda apatqa ushyrady. Lainer Almatydan Astanaǵa baǵyt alǵanymen, áýege kóterilgennen keiin kóp uzamai biiktigin joǵaltqan. Keiin ol áýejai mańyndaǵy qorshaýdy soǵyp, eki qabatty úige soǵylǵan.
Bortta 93 jolaýshy jáne 5 ekipaj múshesi bolǵan. Apat saldarynan 12 adam qaza tapty.
58 jastaǵy Marat Muratbaev - apatqa ushyraǵan ushaqtyń komandiri. Ol oqiǵa ornynda kóz jumǵan. 54 jastaǵy Meiirjan Moldaqulov jaraqat alyp, aýrýhanaǵa jetkizildi. 2020 jyldyń 21 qańtarynda onyń jaǵdaiy turaqty dep tanylyp, úiine shyǵarylǵan. Alaida bir aptadan keiin ol da qaitys boldy.
Ushqyshtarǵa qatysty is Qylmystyq kodekstiń 344-babynyń 3-bóligi («Áýe kóligin paidalaný nemese basqarý kezinde qaýipsizdik erejelerin buzý, abaisyzdyqtan eki nemese odan da kóp adamnyń ólimine ákep soǵý») boiynsha qaraldy.
Sot sheshimi
Sot eki ushqyshty da kináli dep tanydy, biraq olardyń qaza bolýyna bailanysty jaza taǵaiyndaǵan joq.
"Marat Muratbaev pen Meiirjan Moldaqulov Qylmystyq kodekstiń 344-baby 3-bóligi boiynsha kináli dep tanylsyn, alaida qaitys bolýyna bailanysty olarǵa jaza qoldanylmaidy", – dedi sýdia Dastan Álmaǵambetov.
Memleket 1,7 million teńge kólemindegi protsessýaldyq shyǵyndardy óz esebinen óteidi.
Bek Air kompaniiasynyń múlkine salynǵan tyiym azamattyq ister qaralyp bitkenshe kúshinde qalady.
Jábirlenýshiler jalpy somasy 4,8 milliard teńge kóleminde ótemaqy talap etken.
