Frantsiia áskeri-teńiz kúshteri Reseidiń «kóleńkeli flotyna» qatysy bar degen kúdikpen DF Peak munai tankerin Úndi muhityndaǵy Reiýnon aralyna baǵyttady, al Máskeý bul áreketti «qaraqshylyq» dep atady, dep habarlaidy dalanews.kz.
Frantsiia áskeri kúshteri 12 qazanda Reiýnon aralynan shamamen 450 teńiz mili qashyqtyqta tankerdi toqtatyp, bortqa tekserý júrgizdi. Frantsiia prezidenti Emmanýel Makronnyń málimdeýinshe, keme jalǵan tý astynda júzip, janarmaidy zańsyz tasymaldaýǵa qatysy bolýy múmkin.
Frantsiia armiiasynyń ókili Ksave Rival kemeniń týyna qatysty kúmán saqtalǵanyn aitty. Osyǵan bailanysty prokýrordyń sheshimimen tanker Reiýnon aralyna jetkizilip, jaǵdaidy egjei-tegjeili tekserý josparlanǵan.
Ustalǵan DF Peak tankeri buǵan deiin Kaliningrad ataýymen júrgen jáne Benin týyn paidalanǵan. Keme 2024 jyly AQSh, Ulybritaniia jáne Eýropalyq odaqtyń sanktsiialaryna ilikken. Keme qozǵalysyn baqylaityn derekterge sáikes, ol jartylai júk tiegen kúide bolǵan jáne sońǵy ret 12 qazanda Madagaskar jaǵalaýynda tirkelgen. Buǵan deiin Venesýeladaǵy Gýanta portynan shyqqany kórsetilgen.
Máskeý Frantsiianyń áreketin zańsyz dep sanaidy
Reseidiń Frantsiiadaǵy elshiligi tankerdiń ustalýyn halyqaralyq quqyqtyń óreskel buzylýy dep baǵalap, bul áreketti «qaraqshylyq» dep atady. Resei tarapy keme ekipajynyń arasynda Resei azamattary bar-joǵyn anyqtap jatqanyn málimdedi. Elshilik Frantsiia Reseige tankerdiń ustalǵany týraly aldyn ala habarlamaǵanyn da aitty.
Reseidiń «kóleńkeli floty» dep atalatyn kemeler jelisi Batys sanktsiialaryna qaramastan munai tasymaldaý úshin paidalanylady. Mundai kemelerdiń ieleri men tirkelgen elderi jii ózgerip, júktiń shyǵý tegi men naqty iesin anyqtaý qiyndaidy. Batys elderi bul tasymaldardy shekteý arqyly Reseidiń munai kirisin azaitýdy kózdeidi.
Reuters málimetinshe, DF Peak — Frantsiia 2024 jyldan beri Reseimen bailanysy bar dep kúdiktenip ustaǵan kemelerdiń keminde besinshisi.
