الماتىنىڭ تۇركسىب اۋداندىق سوتى 2019 جىلى بولعان Bek Air ۇشاعىنىڭ اپاتىنا قاتىستى ۇكىم شىعاردى، دەپ حابارلايدى Dalanews.kz.

Bek Air كومپانياسىنا تيەسىلى Fokker 100 ۇشاعى 2019 جىلدىڭ 27 جەلتوقسانىندا اپاتقا ۇشىرادى. لاينەر الماتىدان استاناعا باعىت العانىمەن، اۋەگە كوتەرىلگەننەن كەيىن كوپ ۇزاماي بيىكتىگىن جوعالتقان. كەيىن ول اۋەجاي ماڭىنداعى قورشاۋدى سوعىپ، ەكى قاباتتى ۇيگە سوعىلعان.

بورتتا 93 جولاۋشى جانە 5 ەكيپاج مۇشەسى بولعان. اپات سالدارىنان 12 ادام قازا تاپتى.

58 جاستاعى مارات مۇراتبايەۆ - اپاتقا ۇشىراعان ۇشاقتىڭ كومانديرى. ول وقيعا ورنىندا كوز جۇمعان. 54 جاستاعى مەيىرجان مولداقۇلوۆ جاراقات الىپ، اۋرۋحاناعا جەتكىزىلدى. 2020 جىلدىڭ 21 قاڭتارىندا ونىڭ جاعدايى تۇراقتى دەپ تانىلىپ، ۇيىنە شىعارىلعان. الايدا ءبىر اپتادان كەيىن ول دا قايتىس بولدى.

ۇشقىشتارعا قاتىستى ءىس قىلمىستىق كودەكستىڭ 344-بابىنىڭ 3-بولىگى («اۋە كولىگىن پايدالانۋ نەمەسە باسقارۋ كەزىندە قاۋىپسىزدىك ەرەجەلەرىن بۇزۋ، ابايسىزدىقتان ەكى نەمەسە ودان دا كوپ ادامنىڭ ولىمىنە اكەپ سوعۋ») بويىنشا قارالدى.

سوت شەشىمى

سوت ەكى ۇشقىشتى دا كىنالى دەپ تانىدى، ءبىراق ولاردىڭ قازا بولۋىنا بايلانىستى جازا تاعايىنداعان جوق.

"مارات مۇراتبايەۆ پەن مەيىرجان مولداقۇلوۆ قىلمىستىق كودەكستىڭ 344-بابى 3-بولىگى بويىنشا كىنالى دەپ تانىلسىن، الايدا قايتىس بولۋىنا بايلانىستى ولارعا جازا قولدانىلمايدى"، – دەدى سۋديا داستان الماعامبەتوۆ.

مەملەكەت 1،7 ميلليون تەڭگە كولەمىندەگى پروسەسسۋالدىق شىعىنداردى ءوز ەسەبىنەن وتەيدى.
Bek Air كومپانياسىنىڭ مۇلكىنە سالىنعان تىيىم ازاماتتىق ىستەر قارالىپ بىتكەنشە كۇشىندە قالادى.

جابىرلەنۋشىلەر جالپى سوماسى 4،8 ميلليارد تەڭگە كولەمىندە وتەماقى تالاپ ەتكەن.