Aldaǵy jańa jylda Imanǵali Tasmaǵambetovtyń ODKB tóraǵasy retindegi ókilettiligi aiaqtalady. Ujymdyq qaýipsizdik uiymy ózine jańa tóraǵa sailaýy tiis. Jáne ol Qazaqstan ókili bolmaidy. Endi «Jańa Qazaqstan» Imanǵali Nurǵaliulyna el ishinen saiasi yqpaly joq, biraq bedeli bar qoǵamdyq qyzmet usynýy múmkin.
«Imekeń úsh jyl úide nemere baǵyp, zeinette otyrdy. Biraq jybyrlap qalǵan, túrli memlekettik qyzmette uzaq jyldar boiy júrgen adam úshin úide jumyssyz otyrý psihologiialyq jaǵynan óte qiyn. Aqorda da ony jaqsy biledi. Eki aidan keiin ODKB-daǵy kreslosyn ótkizip berýi tiis. Endi Imanǵali Tasmaǵambetovke «Qazaqstan halqyna», «Otandastar» siiaqty qoǵamdyq qorlardy basqarý, ózi qalaǵan mýzeiine direktor bolý nemese ulttyq statýsy bar ýniversitetke rektor bolýdy usyný ideiasy túrli kabinetterde talqylanyp júr. Mysaly, Janseiit Túimebaev rektor bolyp ádemi otyr ǵoi. Endigi másele Imekeńniń osy usynystardy qalai qabyldaityndyǵynda», - deidi, DALA INSIDE derekkózi.
Bir nárse anyq. Astana Tasmaǵambetovti Resei men Kremlden ary ustaý boiynsha printsipialdy pozitsiiada otyr. Sondyqtan Tas jumys istegisi kelse, eldiń ishinde, saiasi yqpaly joq, qaýipsiz qyzmetterdi atqaratyn bolady. Oǵan qor basshysy nemese joǵarǵy oqý ornynyń rektory syndy jumystar eń laiyq dep tanylǵan. Bul eki jaqqa da tiimdi sheshim. Imanǵali Nurǵaliulynyń qyzmet boiynsha ambitsiiasy qanaǵattanady. Óz kezeginde de «Sol jaǵalaý» da tranzitti kezeń aldynda barynsha qaýipsizdigin qamtamasyz etpek. Áńgime taraptardyń qalai kelisetinine kelip tirelip tur.
2019 jyly Nurǵaliuly zeinet jasy 63-ke tolyp qoidy. Qazir 69 jasty eńserip otyr. Tasmaǵambetov 37 jasynda Prezidenttiń kómekshisi, al 39 jasta Premer-Ministrdiń orynbasary, 45 jasynda Úkimet basshysy qyzmetine otyrǵan adam. 2002-2008 jyldar aralyǵynda "harizmasy myqty, qazaqsha erkin sýyratyn Tasmaǵambetov Qazaqstannyń kelesi prezidenti bolady" degen qoǵamdyq pikir myqtap qalyptasty. Dál sol ýaqyttan bastap Nazarbaev ony alysqa jibermei týra qasynda 2017 jylǵa deiin ustap keldi. 2017 jyldan bastap Tas Reseige elshi bolyp taǵaiyndaldy da, osy ýaqyttan bastap onyń 8 jylǵa sozylǵan Kremlmen jaqyndasý kezeńi bastaldy. 2019 jyly Qazaqstan ony zeinetke shyǵaryp jiberdi. Al 2022 jyly qazaq memleketi atynan ODKB tóraǵalyǵyna usyndy.
Máskeýdegi ODKB shtab-páterine aýysqan Tasmaǵambetovtyń 2022-2024 jyldar aralyǵynda Reseidiń aqparattyq yqpalynda bolyp, Kreml syzyp bergen narrativterdi kóp qoldanǵanyn qoǵam óz kózimen kórdi. Ásirese onyń NATO-ǵa qarsy susty málimdemeleri, Ýkrainaǵa aibat shegýi ol týraly qazaq qoǵamynda basqasha pikir qalyptastyra bastady. Artynan Tas tikelei qazaq qaýymyna «óz ultymnyń múddesi jolyndamyn» degen signaldy arnaiy málimdeme arqyly jetkizgen edi.
Negizi Imanǵali Nurǵaliulyn qazaqqa qarsy adam dep aitý óte qiyn. 2000 jyly onyń bastamasymen uiymdastyrylǵan ekspeditsiia Mońǵoliiadan Kúltegin stellasynyń kóshirmesin alyp keldi. Tasmaǵambetov Kenesary qozǵalysynyń serigi, 1916 jylǵy Reseige qarsy ult-azattyq kóterilis jetekshileriniń biri Keiki batyrdyń súiegin elge qaitarý isin memlekettik deńgeide uiymdastyrdy. Vitse-premer qyzmetinde júrgende Tasmaǵambetov eldegi barlyq balabaqshalardy qazaq tilinde etý ideiasyn usyndy. 2017 jyly vitse-premer retinde ol «Alash» qozǵalysynyń 100 jyldyǵyna daiyndyq jumystaryn da úilestirdi.
Tasmaǵambetovtyń jańa qyzmeti týraly jańalyqtar kelesi jyldyń naýryz aiynda paida bolady dep kútilýde. DALA INSIDE onyń mansaby men taǵdyryn áli biraz baqylaidy.
