Qazaqstanda ipotekalyq nesielerdiń paiyzdyq mólsherlemesi aitarlyqtai tómendeýi qajet. Bul týraly Qarjy naryǵyn retteý jáne damytý agenttiginiń tóraǵasy Mádina Ábilqasymova málimdedi, dep habarlaidy Dalanews.kz.
“Agenttiktiń ustanymy – ipotekalyq nesielerdiń paiyzdyq mólsherlemesi 20%-dan aspaýy kerek. Tipti 20% - bul óte joǵary kórsetkish. Mundai mólsherleme qaryz alýshylar úshin úlken qarjylyq salmaq pen artyq tólem týdyrady. Biz mólsherleme budan da tómen bolýy tiis dep sanaimyz. Alaida qazirgi kezde infliatsiiamen kúres júrip jatqandyqtan, bazalyq mólsherleme joǵary deńgeide saqtalyp otyr. Sol sebepti ipoteka mólsherlemesin 20%-ǵa deiin tómendetý keiinge qaldyryldy", — dedi Ábilqasymova Májilis kýlýarynda sóilegen sózinde.
Onyń aitýynsha, agenttik ipotekalyq nesieler boiynsha paiyzdyq mólsherlemeni saralaý tetigin engizýdi josparlap otyr.
"Mysaly, eger bastapqy jarna joǵary bolsa, shamamen 70% kóleminde, onda paiyzdyq mólsherleme tómen bolýy múmkin. Al eger bastapqy jarna 30%-dan az bolsa, onda mólsherleme joǵary bolýy kerek. Bul adamdardy jaýapkershilikpen qaryz alýǵa yntalandyrady", - dep túsindirdi agenttik basshysy.
Sonymen qatar Mádina Ábilqasymovanyń aitýynsha, agenttik "Otbasy bank" úlgisindegi turǵyn úi qurylys jinaq júiesin ekinshi deńgeili bankterge de taratýdy usynýda.
"Iaǵni, azamattar belgili bir ýaqyt ishinde bankte tómen paiyzben depozitte qarajat jinap, belgili bir mólsherge, mysaly, 50%-ǵa deiin jetken soń, tómen paiyzdyq mólsherlememen ipoteka alý múmkindigine ie bola alady. Keibir bankter mundai turǵyn úi jinaq depozitterin engizýge daiyn ekenin bildirip otyr", - dedi Ábilqasymova.
