Májilistiń jalpy otyrysynda depýtat Aidarbek Qojanazarov Qarjy naryǵyn retteý jáne damytý agenttiginiń tóraiymy Mádina Ábilqasymovaǵa saýal joldady. Ol islamdyq bankingke qatysty jańa zań jobasynyń tiimdiligi men onyń elimizdiń qarjy júiesine yqpaly jóninde suraq qoidy, dep habarlaidy Dalanews.kz.
Depýtattyń aitýynsha, islam qarjylandyrý tetikterin engizý halyqtyń senimin arttyrýmen qatar, bank sektorynda ádil jáne ashyq qaǵidattardy nyǵaitýǵa múmkindik berýi tiis.
Qarjy naryǵyn retteý jáne damytý agenttiginiń tóraiymy Mádina Ábilqasymovanyń aitýynsha, elimizde islamdyq bankingti damytý baǵytynda naqty qadamdar jasalyp jatyr. Buǵan deiin mundai qyzmet kórsetý úshin jeke islam bankin qurý qajet bolsa, endi jumys istep turǵan ámbebap bankter óz qurylymynda arnaiy "islamdyq bólimshe" asha alady.
"Qarjylandyrýdyń balama tetikterin keńeitý maqsatynda ámbebap bankterge qoldanystaǵy litsenziia negizinde islamdyq bank operatsiialaryn júzege asyrý quqyǵyn berý usynylady. Bul bankterge jeke institýt ashpai-aq, óz bólimsheleri arqyly islam qarjy ónimderin usynýǵa múmkindik beredi", - dedi Mádina Ábilqasymova Májilistiń jalpy otyrysynda.
Mundai bólimshelerde býhgalterlik esep pen qarjylyq baqylaý jeke júrgiziledi, qyzmetkerler arnaiy daiyndyqtan ótedi. Sonymen qatar, barlyq operatsiialar men ónimder shariǵat keńesiniń maquldaýynan ótip, táýelsiz aýdit tekserisinen ótedi. Bul islamdyq banking qaǵidalarynyń tolyq saqtalýyn qamtamasyz etýge baǵyttalǵan.
Sondai-aq Qojanazarov ámbebap bankterge islamdyq bank operatsiialaryn júrgizý quqyǵyn berý kezinde shariǵat talaptarynyń tolyq saqtalýyna jáne qadaǵalaý mehanizmderiniń naqty bolýyna nazar aýdardy.
