Abai oblysyna jumys saparymen barǵan Oqý-aǵartý ministri Juldyz Súleimenova óńirdegi bilim berý uiymdarynyń jumysymen tanysyp, ustazdar men oqýshylardyń jetistigine joǵary baǵa berdi, dep habarlaidy Dalanews.kz.
Ministrdiń sapary Besqaraǵai jáne Aiagóz aýdandarynan bastalyp, Jarma aýdanynda jalǵasty. Aiagóz aýdanynda ol Memleket basshysynyń tapsyrmasymen salynǵan jańa «Keleshek mektebiniń» ashylý saltanatyna qatysty. Halyqaralyq standarttarǵa sai, 600 orynǵa arnalǵan zamanaýi mekteptiń qurylysyn ministr erekshe atap ótti.
Sonymen qatar Juldyz Súleimenova shaǵyn jinaqty Basshykól mektebine baryp, aýyldyq bilim ordasynyń jumysyna oń baǵasyn berdi.
«Mekteptiń ishki mádenieti, sabaq berý ádisi jáne ustazdardyń kásibi daiyndyǵy meni qatty qýantty. Aýyldyq mektepterdiń osyndai deńgeige jetýi – ustazdardyń eńbeginiń jemisi», – dedi ministr.
Sapar barysynda ol Jarma aýdanyndaǵy Aqtailaq bi mektebinde bolyp, oqýshylardyń ǵylymi izdenisterin joǵary baǵalady. Mekteptiń ǵylymi jobalarynyń biri — jaýyn-shashyn mólsheri men jerge sińý protsesin matematikalyq modeldeý. Bul joba respýblikalyq ǵylymi baiqaýda jeńimpaz atanǵan. Osy mekteptiń eki oqýshysy «Aiqanat» mektebinen grant utyp alyp, búginde 10–11 synyptarda bilim alyp jatyr.
«Bul mekteptiń ustazdary – naǵyz jańashyl pedagogtar. Eńbek pánin jańa ádistememen oqytady. Al “Oqý taim” atty bir aida bir kitap oqýǵa arnalǵan jobalary – balalardyń oqý mádenietin qalyptastyrýda óte tiimdi bastama. Osyndai tájiribelerdi ózge óńirlerge de úlgi etý qajet dep sanaimyn», – dedi ministr.
Súleimenova Abai oblysyn elimizdegi bilim men ǵylymnyń negizgi ortalyǵy dep atap ótti.
«Abai oblysy – qazaq intelligentsiiasynyń altyn besigi. Bul óńirdiń ustazdary men oqýshylary respýblikalyq jáne halyqaralyq deńgeidegi ǵylymi jáne pándik olimpiadalarda únemi kósh bastap keledi. Sondyqtan men ustazdarǵa alǵysymdy bildirip, ata-analar men balalarǵa sálem joldaimyn», – dedi ol.
