Qazaqstanda mobildi aýdarym jasaý erejeleri ózgerdi. Bul týraly Ulttyq bank pen Qarjy naryǵyn retteý jáne damytý agenttigi (QNRDA) habarlady. Endi eger klient aýdarym kezinde telefon arqyly sóilesip tursa, bank operatsiiany avtomatty túrde buǵattaidy, dep habarlaidy Dalanews.kz.
Bul shara telefon arqyly jasalatyn alaiaqtyqtyń aldyn alýǵa baǵyttalǵan.
Jańa talaptar
Qazaqstanda bankter men mikrokqarjy uiymdary úshin aqparattyq qaýipsizdikke qoiylatyn jańa talaptar kúshine endi. Tiisti qaýlyny QNRDA basqarmasy bekitken.
Eń basty jańalyqtardyń biri – telefonmen sóilesý kezinde aýdarym jasaýǵa tyiym salý.
Endi eger klient aqsha aýdaryp jatqan sátte telefonnyń mikrofony belsendi bolsa, mobildi qosymsha operatsiiany avtomatty túrde buǵattaidy. Sondai-aq, qurylǵyny qashyqtan basqarý belgileri baiqalsa, qosymsha keibir fýnktsiialardy óshirip nemese operatsiiany tolyqtai toqtata alady.
Bankter men mikroqarjy uiymdaryna qoiylatyn jańa mindetter:
jańa qurylǵydan kirý kezinde klientti biometriialyq sáikestendirýden ótkizý (derekterdi Identifikatsiia derekterin almasý ortalyǵy arqyly rastaý);
barlyq kirý áreketteri, parol nemese telefon nómirin ózgertý týraly habarlamalar jiberý;
klienttiń kelisimimen geolokatsiia derekterin berý;
qaýipti osaldyqtar anyqtalǵan jaǵdaida qosymshany májbúrli túrde jańartý;
ár úsh jyl saiyn ISO/IEC 27001 standarty boiynsha syrtqy aýditten ótip, aqparattyq júielerdiń turaqtylyǵyn tekserý úshin táýelsiz penetration-test júrgizý.
Kibershabýyldarǵa qarsy sharalar
Qaýly bankter men retteýshi organ arasyndaǵy kiberintsidentter týraly aqparat almasý júiesin de qamtidy. Bul júie shabýyldarǵa jyldam áreket etýge múmkindik beredi.
Qujat resmi jariialanǵan kúnnen keiin on kúnnen soń kúshine enedi, al aqparattyq qaýipsizdikke qatysty negizgi ózgerister 2025 jyldyń 1 qarashasynan bastap qoldanyla bastady.
