قازاقستاندا ءموبيلدى اۋدارىم جاساۋ ەرەجەلەرى وزگەردى. بۇل تۋرالى ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگى (قنردا) حابارلادى. ەندى ەگەر كليەنت اۋدارىم كەزىندە تەلەفون ارقىلى سويلەسىپ تۇرسا، بانك وپەراسيانى اۆتوماتتى تۇردە بۇعاتتايدى، دەپ حابارلايدى Dalanews.kz.

بۇل شارا تەلەفون ارقىلى جاسالاتىن الاياقتىقتىڭ الدىن الۋعا باعىتتالعان.

جاڭا تالاپتار

قازاقستاندا بانكتەر مەن ميكروكقارجى ۇيىمدارى ءۇشىن اقپاراتتىق قاۋىپسىزدىككە قويىلاتىن جاڭا تالاپتار كۇشىنە ەندى. ءتيىستى قاۋلىنى قنردا باسقارماسى بەكىتكەن.

ەڭ باستى جاڭالىقتاردىڭ ءبىرى – تەلەفونمەن سويلەسۋ كەزىندە اۋدارىم جاساۋعا تىيىم سالۋ.
ەندى ەگەر كليەنت اقشا اۋدارىپ جاتقان ساتتە تەلەفوننىڭ ميكروفونى بەلسەندى بولسا، ءموبيلدى قوسىمشا وپەراسيانى اۆتوماتتى تۇردە بۇعاتتايدى. سونداي-اق، قۇرىلعىنى قاشىقتان باسقارۋ بەلگىلەرى بايقالسا، قوسىمشا كەيبىر فۋنكسيالاردى ءوشىرىپ نەمەسە وپەراسيانى تولىقتاي توقتاتا الادى.

بانكتەر مەن ميكروقارجى ۇيىمدارىنا قويىلاتىن جاڭا مىندەتتەر:

جاڭا قۇرىلعىدان كىرۋ كەزىندە كليەنتتى بيومەتريالىق سايكەستەندىرۋدەن وتكىزۋ (دەرەكتەردى يدەنتيفيكاسيا دەرەكتەرىن الماسۋ ورتالىعى ارقىلى راستاۋ)؛

بارلىق كىرۋ ارەكەتتەرى، پارول نەمەسە تەلەفون ءنومىرىن وزگەرتۋ تۋرالى حابارلامالار جىبەرۋ؛

كليەنتتىڭ كەلىسىمىمەن گەولوكاسيا دەرەكتەرىن بەرۋ؛

ءقاۋىپتى وسالدىقتار انىقتالعان جاعدايدا قوسىمشانى ءماجبۇرلى تۇردە جاڭارتۋ؛

ءار ءۇش جىل سايىن ISO/IEC 27001 ستاندارتى بويىنشا سىرتقى اۋديتتەن ءوتىپ، اقپاراتتىق جۇيەلەردىڭ تۇراقتىلىعىن تەكسەرۋ ءۇشىن تاۋەلسىز penetration-تەست جۇرگىزۋ.

كيبەرشابۋىلدارعا قارسى شارالار

قاۋلى بانكتەر مەن رەتتەۋشى ورگان اراسىنداعى كيبەرينسيدەنتتەر تۋرالى اقپارات الماسۋ جۇيەسىن دە قامتيدى. بۇل جۇيە شابۋىلدارعا جىلدام ارەكەت ەتۋگە مۇمكىندىك بەرەدى.

قۇجات رەسمي جاريالانعان كۇننەن كەيىن ون كۇننەن سوڭ كۇشىنە ەنەدى، ال اقپاراتتىق قاۋىپسىزدىككە قاتىستى نەگىزگى وزگەرىستەر 2025 جىلدىڭ 1 قاراشاسىنان باستاپ قولدانىلا باستادى.