Memleket basshysynyń Jarlyǵymen Qazaqstan Respýblikasy ishki saiasatynyń negizgi qaǵidattary, qundylyqtary men baǵyttary bekitildi, dep habarlaidy Dalanews.kz.
Ulttyq quryltaidyń IV otyrysynda sarapshylar men qoǵam qairatkerleri ishki saiasat salasynda júrgizilip jatqan barlyq jumysty retteitin biryńǵai tujyrymdamalyq qujat ázirleýdi usynǵan edi. Prezident bul ideiany qoldap, onyń memlekettik qurylymdar jumysyn júielendirýge baǵyttalýy kerek ekenin atap ótken bolatyn.
Prezident Ákimshiligi men múddeli memlekettik organdar Memleket basshysynyń jyl saiynǵy Joldaýlaryn, sóilegen sózderin, Qazaqstan Respýblikasynyń 2029 jylǵa deiingi ulttyq damý josparyn negizge ala otyryp, «Ishki saiasattyń negizgi qaǵidattary, qundylyqtary men baǵyttary» qujatyn daiyndady.
Tujyrymdamalyq qujatty ázirleýge Ulttyq quryltaidyń músheleri, sarapshylar, ǵylymi jáne qoǵamdyq uiymdardyń ókilderi belsene atsalysty.
Atalǵan qujat birinshi kezekte memlekettik organdarǵa arnalǵan. Onyń basty maqsaty – ishki saiasat salasyndaǵy jumysty júieleý ári úilestirý.
Onda «Zań jáne tártip», «Halyq únine qulaq asatyn memleket», «Túrli kózqaras – birtutas ult», «Kúshti Prezident – yqpaldy Parlament – esep beretin Úkimet», «Adal azamat», «Taza Qazaqstan» sekildi ishki saiasat qaǵidattary qamtylǵan.
Sondai-aq Ulttyq quryltai otyrystarynda kóterilgen jalpyulttyq qundylyqtardyń tizbesi engizildi. Jalpyulttyq biregeilikti tanytatyn ulttyq nyshandar júiesi jasaldy.
Qujatta qoǵamdyq dialog, etnosaralyq qatynas, din, mádeni-gýmanitarlyq, otbasy, jastar, aqparat sekildi ishki saiasattyń basym baǵyttary aiqyndalǵan. Qabyldanǵan tujyrymdamalyq qujat memlekettik organdardyń ishki saiasat salasyndaǵy jumysyn uiymdastyrýǵa negiz bolady.
